《魚缸博客》兩市拍出高價地，唔通係內地樓市轉好嘅訊號？

　　《魚缸博客》昨日（２０日）青島嶗山王家村３５號地皮開拍，起拍價每平方米２８７９６
元人民幣，總價約１３﹒７５億元人民幣，競買保證金約６﹒８８億人幣。經過個幾鐘頭、
３６４輪競價，最終被青島海業益佳地產開發有限公司以約１８﹒８７億元人民幣投得，較底價
高出３７﹒２％。以平均樓面價每平方米３９５１６人民幣計算，唔單止創下嶗山區之前記錄（
樓面價約每平方米２﹒５萬元人民幣）；仲超越之前青島市地王，位於南區萊陽路８號地皮（成
交價每平方米３３９０１人民幣），按樓面價計，成為青島市新地王。
　　無獨有偶，南京市前日（１９日）亦拍出該市史上第二高價地。該地皮位於河西南，經過
４７輪競價，被奧體建設以總價１７﹒４億元人民幣投得，樓面價每平方米４３８８８人民幣，
同２０１６年５月該市拍出嘅葛洲壩地王僅差每平方米１３２５人民幣。
　　不過，根據國家統計局日前公布嘅數據測算，５月份７０個大中城市新建商品住宅價格指數
按年挫３﹒９％，連續７個月跌幅擴大，並且創自２０１５年６月勁挫４﹒９％後最大跌幅；按
月計，５月一手樓價再降０﹒７％，為２０１４年１０月以來最差。按年及按月計均連跌１１個
月。
　　雖然中央５月１７日推出減按息及放寬借貸等政策組合拳救市後，樓市氣氛略有改善，但社
會基本面無法一下子扭轉，社會零售消費等亦未見大幅增長。呢頭國家統計局公布完５月樓價下
挫，嗰頭已經有新地王誕生，實在令人有啲意料之外。希望內地樓市是真復甦，而剛成交嘅新地
王亦係真地王，唔係巧合，亦唔係用來宣示本地樓市極速復甦嘅樣板地王就好啦。
　　不過，就算有新地王誕生，買內房股都要小心挑選，畢竟風險唔細。如果投資者對內房股感
興趣，可以留意下物管股比如華潤萬象（０１２０９），相對來講風險會比較低。畢竟有國企背
景，加埋業績穩定。自２０１９年以來，華潤萬象無論係營收定係純利，每年都有唔錯嘅增長。
股價上月去到３３銀左右開始向下，近日喺２７元附近橫行，可以小注入市，博升返３０銀以上
。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。