《小傳日記》AI開發新藥又有新玩法！臨床數據都可以取代？

　　近期無乜嘢炒，魚缸悶到要喺雪櫃搵返啲舊貨出嚟兜兩兜，好似AI、醫藥之類，仲連SaaS都有翻炒嘅機會，就知魚缸係缺水兼缺主題。AI股炒過，藥股炒過，咁AI藥股又如何呢？

　　魚缸第一隻18C股晶泰(02228)（正名QUANTUMPH，申請緊改返中文名晶泰控股），就係AI藥股嘅代表，公司最大業務就係用AI系去預演唔同化合物組合出嚟會對生物起到咩反應，傳統大海撈針逐隻試需時以年計，但用上晶泰嘅AI預測就可以慳到只係用唔使兩個月就可以搵到潛在候選組合。

　　近期有間外國嘅生科AI平台獨角獸公司Iambic，就宣布推出咗「Enchant」AI平台，就同晶泰嘅平台有啲類似，但同晶泰比拼化合物嘅反應同，Enchant主力係預演人體反應。人體臨床試驗數據矜貴，即使有AI平台，試驗候選組合嗰陣都有可能因為人體試驗數據不足而令到結果有可能唔夠全面。而Enchant就希望用AI嘅深度學習功能，運用僅有嘅少旺臨床數據、動物測試以及細胞實驗數據，經AI平台深度學習後搵出當中嘅規律，整合出嚟再預演出候選藥物喺人體有可能出現嘅吸收、靶向、代謝等等反應，可以作為臨床實驗嘅輔助甚至替代。

　　而究竟AI喺生物科技研究上係「輔助」定係「替代」，目前都仲要試，正如魚缸入面都未出到多幾隻「AI醫藥」概念股，AI喺變幻莫測嘅人體上可以去到幾準確，都未知道。但深度學習嘅強大就在於，只要有時間，億萬個結果都可以指日可待，所以AI喺早期藥物研究上一定大有作為，至少好似晶泰嘅技術就可以大大縮減逐個化合物組合測試嘅過程，加快新藥推出進程，偉大啲講就有助人類福祉，短淺啲講就有助新藥喺魚缸嘅炒作囉，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。