今日係港股值得紀錄嘅一日！一直被睇淡嘅魚缸喺阿爺加持之下，連日來成交暴增，今日更加創下史無前例嘅4457億最高單日成交紀錄！今年國慶真係有普世歡騰嘅感覺。
回顧返今個星期阿爺對於推升大市力度同密度都係前所未見，星期二(24號)由人行、中證監同金監總局三巨頭聯合推出三招刺激樓市，先有降準0.5百分點，二有降存量房貸利率0.5個百分點，三有再降第二套房最低首付比例由25%至15%，已經刺激內房股暴升一浸。星期四噚日(25號)就改由零售層面出發，上海發改委宣布大派5億消費券，餐飲用途佔過半，刺激半死狀態嘅餐飲股鹹魚翻生，同日都舉行罕見嘅9月份政治局會議，加多兩錢肉緊話要有力度降息，刺激恒指再升差唔多800點。到今日再傳有兩萬億銀特別國債，主力刺激消費同解決地方債，尾市再傳一線城市可能取消非本地戶籍購房限制消息，造就今日又升700點兼4400億銀成交紀錄。
今個禮拜嘅政策消息密度就好似放煙花一樣，孖屐都心領神會係為咗喺國慶前製造一片大旺景象，而魚缸都成功達到4400億歷史成交額紀錄。近兩日都有孖屐人講緊，今輪救市嘅猛烈程度令到淡友要急劇補倉之外，更加係真正吸引到中外資金要回魚缸加大部署。
但睇返其實今次措施都唔係無出過，只係今次嘅力度同密集程度都係前所未見，綜合多個政策先可以刺激到大市四日急升2500點。2500點反映咗對目前政策憧憬，但股市係炒預期，假如後市結果唔符合預期，指數可以急升，都可以急跌啫。
9月呢下半個月以來嘅升勢，令到孖屐人都唔敢亂估頂，難得大升市，唔知幾時先係頂。但目前恒指9日RSI已經成92，屬超級嚴重超買，後市隨時要回吐一啲都唔出奇，無貨難追，有貨要睇路！請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
樂本健【秋日開倉26 - 27/9】保健品低至$20！► 火速行動
42,313.00
5,738.17
