《小傳日記》市況陰晴不定,令好多計劃上市嘅公司都舉旗不定,巴巴(09988)叫停
分拆,小小超FWD又話要等陣先,而送嘢嗱嗱聲嘅Lalamove喺上市方面就明顯嗱嗱聲
唔倒,繼上年兩次遞表之後,呢幾日又再向聯交所敲門遞表。
過咗業績期,Lalamove阿媽拉拉科技份招股書都update咗2023年業績數
據,經調整純利按年轉虧為盈賺3﹒91億美元,收入13﹒34億美元按年多接近29%,毛
利增47%至8﹒17億美元,毛利率由2022年53﹒7%增至2023年61﹒2%。整
體成績比起上年仲蝕緊錢嘅最大對手Gogovan阿媽快狗(02246)好得多。
招股書入面Lalamove雖然暫未提到集資後資金喺用途上嘅百分比,但集資用途上面
第一項提到,就係用於鞏固同城貨運市場嘅領先地位,希望喺未來三至五年,擴大滲透率去到更
多具有增長潛力嘅二、三線城市,集中喺河北、河南同江西。更加詳細就係,資金主要用於加大
線上線下推廣,並且係用於招攪同激勵司機。
可以見到Lalamove上市主要都係集資發展下沉市場,大家都知發展下沉市場意味上
層市場嘅飽和,希望搶先一步入主次要市場,即係話Lalamove目前業務都急住擴充。而
神州市場入面既要同Gogovan展開打吡戰,又要同上面美團(03690)、順豐、中通
(02057)打過,所以「天下武功,唯快不破」,愈快集到資愈好,先會大約一年時間內三
次向聯交所遞表。
有公司嫌市況唔好唔上市住,有公司就硬住頭皮都要上市,證明貨運行業競爭都係熱哄哄,
無論送貨定擴充都係最緊要「快」,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】本港無人駕駛自動車最快本月底試運,你會否乘坐?► 立即投票