《小傳日記》宜搜科技急插水！禁售期未過沽空名單先殺到

　　《小傳日記》宜搜科技（０２５５０）今日好似發咗癲咁，股價一路狂瀉，最多跌超過
６７％，低見１５﹒４６銀，創２０２４年７月以嚟嘅新低，真系嚇到股民腳軟！
　
　　講起呢隻股，之前都威過一陣㗎，６月７號上市嗰陣好似開咗外掛，首日股價就飆漲９２％
，之後股價有力再上，截至１０月７號，股價累計漲超過６倍，仲係當時嘅半年內最佳表現半新
股。股民們當時可能都以為執到寶，點知今日都係逃不過大調整嘅命運。
　
　　究竟有乜原因呢？其實上文嘅上市日期已經有晒提示，呢隻半新股即將喺今年１２月７號迎
嚟解禁，一大波ＩＰＯ前投資者同其他現有股東會喺果日解禁合共５９﹒８９％　股份，好似一
顆「定時炸彈」咁。呢隻股仲要係今個月６號被新納入了沽空名單。
　
　　呢個時候，好多精明嘅投資者就好似「嗅到血腥味嘅鯊魚」，覺得機會嚟啦！於是紛紛趁機
沽空宜搜科技。本來市場情緒就有啲唔穩，沽空動作一出，重磅炸彈提前引爆，股民心慌紛紛玩
擊鼓傳花，爭先恐後咁拋售股票，搞到股價自由落體咁，根本停唔到！
　
　　不過港股的沽空交易都有嚴格規矩嘅，例如「賣空提價規則」同嚴禁「裸賣空」，正常嘅上
市公司好難被狙擊成功，但係好似宜搜科技呢種講唔出有咩拳頭產品、上市無耐估值虛高嘅企業
，就好容易做咗炒家砧板上嘅肥羊，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。