《魚缸博客》新威國際（０００５８）今日（３０日）復牌，股價一度大幅飆升，由月初停
牌前收市價５仙１，最高升至０﹒２２４銀，升幅最多接近３﹒３倍，當堂由仙股升上毫子股。
股價之所以升咁多，皆因股東有新搞作。集團公布，建議以每股１０仙發行３５９２萬股新
股，以及發行可換股債券予控股股東、前立法會議員詹培忠。完成後，詹培忠及一致行動人士持
股將由約４１﹒０３％升至５０﹒８６％，按例須提出強制無條件現金要約，每股要約價１０仙
，比９月５日收報５﹒１仙溢價約９６﹒０８％。詹培忠有意維持公司於聯交所之上市地位。
新威國際主要從事製造及買賣預應力高強混凝土管樁、預拌商品混凝土、灰砂磚、加氣混凝
土產品及生態混凝土產品。營收額自２０２１年達到５﹒１６億銀後逐年下跌，２０２３年跌剩
２﹒４７億銀，短短兩年唔見左一半生意，今年上半年進一步下跌至只得１億銀。至於盈利方面
，自２０２０年以來，公司年年蝕錢，少則千幾萬，多則４千幾萬銀。
今次除咗發行新股外，公司又向詹培忠發行本金額３０００萬銀一年期零息可換股債券，奇
就奇在呢３０００萬銀金額之中，有大約２２６８萬銀用作抵銷公司應付認購人款項，餘額以現
金支付。即係話詹培忠只需要攞７３２萬銀出來，就順順將股權進一步擴大至７９﹒４６％。以
壓倒性股權持有新威國際，果然係夠威。
呢２２６８萬銀係詹先生借畀公司墊支日常使費，老闆變苦主。不過，而家唔使變苦主之餘
，仲可以華麗轉身「債轉股」，變相增持公司股份，呢個方法果然高明。當然，嗰２２６８萬銀
應付款項點樣產生，幾時借，用咗係公司邊個環節，呢啲博客就唔估啦，太複雜。
新威國際股價今日高位雖然飆過０﹒２２４銀，但博客執筆呢刻，股價做緊０﹒１５銀，同
開市價差不多，比起停牌前都升咗１﹒９倍。就算按照上面所講，強制無條件現金要約，都係得
０﹒１銀，仲有乜嘢著數？所以，畀博客就唔去趁熱鬧了。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
