《魚缸博客》小米又上近四年高位，預計今年出貨量達1.7億！

　　唔覺唔覺，今日小米（01810）又上左近四年新高，同歷史新高差唔到幾遠！睇返過去呢一年小米真心又威又勢，手機業務依然強勁，同時造車又有迴響，個個都想買部「SU7」（雖然好多人都話車輛質素受到考驗，但依然好多人想要一部）。

　　睇返資料，小米品牌總經理盧偉冰表示，今年小米手機銷售情況依然幾好，全年預估出貨量將達到1.7億部，證明小米行低價策略確實正確得很。事實上，中國面對經濟風口，同時又遇到消費降級，萬幾蚊部蘋果手機已經變得「不香」，相返兩千幾蚊就有部高性能手機就「真香」。

　　另一方面，小米電器嘅產品線已經延伸到冷氣機部分，數據顯示小米空調係今年銷售量有五成幾增長，係內地銷售金額市佔率位列第三；而小米自己本身都起左個新工廠，根據小米集團公關部總經理王化日前在微博透露的信息，明年（2025年）小米就可以自研自產小米空調。

　　小米勢頭確實愈做愈好，亦睇得出公司愈做愈好，相信大行對公司市值亦都會重新評估，博客認為可以分注買入，目前現價入一注，如果跌落31蚊可以考慮再吸納，跌穿30都可以繼續持有，目前睇到支持位係26蚊上落，不過預計短時間內都有機會破歷史新高，博客就唔估頂啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。