驚唔驚喜？意唔意外？美聯儲局減息千呼萬喚始出來，一次過減夠半厘，原本以為金管局循例跟減貼現窗半厘，估唔到中午前後由大笨象滙豐(00005)率先宣布減P 0.5厘，隨後中銀(02388)、渣打(02888)受東亞(00023)都先後宣布減P，唔少孖屐中人都無諗過今次銀行咁快手。
中午滙豐宣布最優惠利率下調50點子至5.625厘，隨後中銀都一樣降50點子至5.625厘，然後渣打同東亞都分別將最優惠利率由6.125厘減50點子至5.875厘。其實都難怪銀行今次咁快手，事實上銀行同業拆息(HIBOR)由8月開始就一直維持下跌趨勢，與樓按相關的一個月拆息更加喺今個星期一最見過3.71%，創上年9月4號以來最低。所以當美國正式減息，正好為銀行提供一個機會正式減P。
雖然孖屐預期今次減P之後未必會再減得太急，原因好有可能係始終唔可以同神州息口差得太遠，但如果未來HIBOR再試落去，都好難排除銀會喺今年剩低兩次嘅議息後宣布減P。
另一方面，銀行減P咁快手都可能同地產商「殷切」盼望有關。上星期五公布嘅最新中原城市領先指報136.66，按周跌1.46%，再創超過8年新低，由2021年8月歷史高位累跌超過28%。樓價跌足咁耐，美聯儲局終於減息，銀行都終於可以乘勢跟減，地產商願望終於有得實現。
而家P就減咗，但最抵嘅滙豐同中銀都仲要5.875厘，減完都唔算係好抵，只可以話無咁大壓力咁囉。有唔少意見都提到，多唔多買樓係好反映買家點睇後市，如果而家神州同香江經濟前景仲係偏淡，都會非常影響買樓意欲。尤其係以往本地樓市之所以炒到上去，都係多得同胞客大手掃貨，如今上消費意欲仲低過呢邊，落嚟買個袋都唔制，又點會買樓？所以樓價要真心升真係仲有排，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】的士記分制將於周末生效，你認為該制度可否幫助的士提升服務質素？► 立即投票
