【理財專題】出糧戶口「自製」回贈？　一文看清邊間銀行最優惠！

　　作為打工仔，幾時都希望公司準時每月出糧。如果連出糧都可以攞著數，當然就更加好。或許不少讀者都有留意，坊間不少銀行時有推廣出糧戶口獎賞優惠，但當中的條款間間銀行都不同，究竟邊間回贈最多？邊間回贈最易攞？即刻睇下以下介紹比較番！

首先要搞清楚：何謂「出糧」

　　所謂出糧戶口，銀行有一套定義，簡單來說，就是每月定期有薪金轉入這個動作，不過，要獲得出糧戶口優惠，銀行都要求出糧一方以銀行轉賬形式存入，例如建行的相關條款就列明，「任何以現金或支票誌帳存入的薪金將不被視為合資格出糧交易。」

　　至於要賺出糧戶口優惠，是否必須要勞煩公司人事部（HR），通知他們為你改出糧戶口？這就視乎每間銀行的要求。事實上，並非每間銀行都要求真正由公司出糧，要顯示「PAYROLL」、「SALARY」、或公司名稱等字眼，才接納的。以自已私人戶口名義每月由A銀行戶口轉錢到B銀行的出糧戶口，亦即設立所謂的「常行指示」（Standing Instruction），亦是方法之一。

Standing Instruction係啲乜？

　　Standing Instruction，簡稱SI，類似自動轉賬，設立時需指明支賬戶口，受賬戶口，金額，及每月的某一日，設立之後，銀行便會每個月定時將金額自動過數到指定戶口，類似自動轉賬交租供樓，又或公司出糧一樣，定時定候過數。

（資料圖片）

中銀出糧 公務員回贈高約一倍！

　　眾多有做出糧戶口優惠的銀行中，中銀香港比較益公務員，他們選用中銀出糧服務可以賺到高達2000元信用卡回贈（1800元再加網上登記額外200元），但要賺到盡，參加的公務員就必須要經庫務署「真出糧」才可。如果要用SI自製出糧，就只可以和其他打工仔一樣，最多只可賺到高達1000元回贈（800元再加網上登記額外200元）。緊記，賺中銀出糧優惠還須綁定轉數快是以中銀作為預設修款帳戶，方享回贈！ 

 （iStock圖片）

建銀亞洲渣打 回贈入落戶口

　　不是公務員又如何？月入無咁多又邊間回贈最高？且慢，本欄為你逐一分析。事實上，並非每間銀行都按出糧或SI銀碼大小去釐定回贈額。以建銀亞洲為例，每月出糧銀碼最低要求僅1萬元，絕對平易近人，而且還接受以SI方式轉入。不過回贈金額也不欺場，按理財戶口分回贈金額，最高可達2000元，還要是存入戶口的「真現金」，一般客戶也有350元。不過留意番，回贈會分為兩階段發放，第一階段會於2022年1月31日或之前入帳，第二階段就是2022年7月31日或之前，所以要收齊回贈，就要乖乖繼續留在該行出糧。

　　另外要留意，貴賓晉裕/貴賓理財/智選理財戶口係必須要落分行開戶。

（iStock圖片）

　　渣打亦是回贈存入戶口，以最高層級月入超過8萬元計，不論理財戶口種類，回贈可達900元；另外客戶亦可選擇收取亞洲萬里通(Asiamiles)里數。

表列銀行出糧戶口優惠詳情（下頁）

【樂本健11月限時優惠！】 憑獨家優惠碼【ETN2511】，購物滿$500即送免費禮品► 了解詳情