《Online有話兒》侵侵終於肯戴返個Mask？因為似Lone Ranger？

 

　　美國總統侵侵（特朗普）狂人形象深入民心，但疫情嚴峻之下，仲係唔肯喺公眾場合戴返個Mask，仲畀對家拜登抽水，話佢「大男人主義」添。不過近日侵侵好似一轉口風，唔通真係「選舉臨近了」？！

 

（Shutterstock圖片)

　
染疫人數274萬，單日新增逾5萬宗

 

其實又邊度似獨行俠呢？（Shutterstock圖片)

　
　　美國確診新冠肺炎人數全球「冧把溫」，達274萬人，單日新增逾5萬宗創新高。另邊廂，侵侵喺星期三（1日）接受FOX訪問時候，突然一轉口風，話喺公眾場合戴返個口罩，其實無咩異議，佢仲話幾喜歡自己戴口罩個樣：

　
　　「因為睇起上嚟有啲似虛構人物『獨行俠』（Lone Ranger）。」

　
　　真係畀佢激死！不過侵侵對於係咪要全國強制戴口罩問題表示保留，因為好多人都自我保持距離，而且佢哋有自由選擇，覺得需要戴嘅時候就會戴，唔需要強迫咁話。

　

第三季經濟反彈，新刺激措施預備中

 

　（Shutterstock圖片)

　　美國6月份非農就業數據就梗係靚仔，新增480萬更加係有紀錄以嚟最高，且遠勝市場預期，侵侵呢一刻梗係牙擦擦，因為佢預計未來幾個月就業數據良好，相信11月總統大選之前都會增長強勁云云！又係「選舉臨近了」，市場傳侵侵正醞釀第四輪刺激措施。

　　之不過，急急腳重啟經濟，搞到美國疫情好似控制唔住，預備爆發第二波咁款，今日仲新增病例5萬幾宗，真係嚇死人咩！不過侵侵係記者會上面講過，經濟重啟速度之快，取得重大成功，而且就業數據強勁，所以證明到經濟正在回升！

　
姆努欽射個波落州政府？

 

　（Shutterstock圖片)

　　不過有人問，造成咁多人感染，華府有無後悔過急急腳重啟經濟呢？財長姆努欽就話啦：

　　「無，絕對不後悔。而且我哋已經制定非常謹慎嘅計劃，而執行計劃嘅責任，應該落返去各個州。」

　　唔重啟經濟，經濟大蕭條好似仲慘慘豬！嘩！仲要射個波落州政府到，真係兩面不是人囉。

 

撰文：李皆穎

 

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

 

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

 

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G 

 

 

 

 

【香港好去處】2026去邊最好玩？etnet為你提供全港最齊盛事活動，所有資訊盡在掌握！► 即睇