《小傳日記》財爺食住退市浪，中概股退市威脅又係關稅戲碼返叮？

　　最近呢個禮拜侵侵真係多嘢搞，最新戰場可能係中概股！前幾日花旗國財長貝森特就話「唔排除要求中概股喺花旗國退市」，搞到中概股心震震，富途上周五（11日）大跌7%、滴滴出行更曾崩跌25%！噚日財爺波叔就即刻接住呢波流量，話已經叫證監會同港交所「做定功課」，如果啲海外上市嘅中概股想返嚟，一定要將香港當成首選。果然呢個消息一出，港交所今日即刻升咗6%，睇嚟市場都幾buy呢個「避風港」劇本。

　　不過話說回頭，侵侵有冇權直接踢走晒啲中概股？根據花旗國證券法，退市權力主要喺SEC同交易所手上，總統唔可以直接落命令叫交易所踢人走。不過2020年花旗國實施咗《外國公司問責法》，SEC有權要求連續三年唔交審計底稿嘅公司強制退市，當時已經有一班國企背景嘅中概股自動自覺撤退，所以如果只要侵侵想踢走晒啲中概股，程序對佢嚟講將只係時間長短問題。

　　不過真係搞到中概股大規模退市，花旗國自己都唔會好過。數據顯示有286間神州公司喺美股掛牌，總市值1.1萬億美金，當中九成係ADR形式。試問投資者持有咁多中概股，突然間話要強制退市，呢啲股票點計？所以就算要強推中概股退市，進程都只會係循序漸進，盡量唔好令股市出現不必要嘅震盪。

　　紐交所、納斯達克呢啲交易所靠收上市費同交易佣金食糊，阿里巴巴(09988)、京東(09618)呢啲巨無霸班師回朝，交易所突然間冇咗過萬億市值嘅生意，未來可能仲要應付投資者索賠同國際信譽受損，仲未計神州可能會報復，好似限制花旗國企業喺神州融資，或者學俄羅斯玩「敵國資產沒收」，到時華爾街班大鱷肯定要損手爛腳。

　　講到尾，今次中概股退市威脅，好大機會都係同上星期嘅對等關稅一個套路--先用極限施壓博神州讓步，見勢色唔對就即刻縮沙，又睇吓侵侵會唔會急急腳出嚟話「暫緩執行」，話唔定到時佢又會話：「我同邊個邊個係好朋友」--呢啲劇情，我哋睇得多啦！請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。