政府近日出盡全力去推廣全民自願檢測，市面熱度非常不足之餘，更加有名醫帶頭唱反調，公開表明唔會做檢測，引致建制派即時群起攻之。政府中人更加擔心，全民檢測最終連一半市民都唔去做的話，令到成件事「白做」，仲要枉費阿爺全力協助。

　　從一開始，政府最敗筆就係「捉錯用神」。政府搞全民檢測，目標係希望截斷社區嘅隱形傳播鏈，要到呢個目標，根本就應該要強制性全民檢測，因為自願性的話，700萬人有600萬人參與，600萬人驗過都無事，大家又會鬆懈，繼續「慶回歸創輝煌」，你又點肯定無測試嘅100萬人係無病毒？又點肯定唔會再有群組大爆發？

　　所以打住「自願」呢個命題，就永遠都做唔到政府希望做到嘅效果。又或者咁講，做啲唔做啲一向就係政府嘅慣用技倆，就好似當日政府打開一個缺口畀海員同空服可以免檢疫，做啲唔做啲之下，最終就搞到第三波，依家特區政府都只不過係「按本子辦事」。

　　亦都係整個疫情之下政府多次嘅處理手法進退失據，令到呢鼓對政府不信任嘅想法一直陰魂不散，可能令到自願檢測無功而返。一開始話搞全民檢測，泛民提出質疑，話會將港人DNA數據送返內地唔知做乜嘢用途，Tina相信有部分人的確係會有咁嘅諗法，但係對於大部分港人嚟講，根本就唔太多擔心呢點。現時包括Tina在內，市民最擔心嘅係，自己好地地無徵狀，亦無接觸過病患、亦唔係高危人士，會唔會因為去檢測而增加自己嘅染疫風險？Tina認識好多有小朋友嘅師奶朋友，佢地經常都好高警覺，有啲連街市都唔去，轉晒網上買餸、超市買餸，避免錢銀找贖增加感染風險，呢班人又點會去排隊自願檢測？有呢種想法嘅人唔使好多，全港人口有兩三成的話，就已經足夠令到自願檢測廢咗武功。所以政府喺呢一刻仲想將責任推去泛民嘅無厘頭陰謀論、推去畀唔響應檢測嘅KOL醫生，根本都仲係重蹈「唔去檢討自己」嘅覆轍。

　　其實要做到全民檢測好容易，雖然香港一國兩制行得咁暢順，但防疫就真係要學國家嘅方式，強制所有香港人一定要進行檢測，否則要罰款，再唔交再罰，相信好快就可以完成700萬個檢測資料。唔想強制要人自願唔係唔得，但自願都要有甜頭，點都要提供誘因叫人去做，交稅嘅可以免一半稅，唔使交嘅可以收到餐飲消費券，等放寬防疫措施之後市民可以去食肆報復式消費，我諗一樣可以吸引全港市民響應。