非建制派噚日(17日)再次坐埋一齊商議第六屆立法會議員續任一年嘅去留問題，一眾議員未能達致共識，但係傳統泛民仍然相信議會防線不能失之下，「主留」似乎已經成為「主流」。

　　講得出係主流，亦即係唔係百分百認同留低。議會陣線朱凱迪早已率先講明自己唔係主留派，其後人民力量陳志全亦都作出相同表述，甚至喺Facebook將自己個名上面「議員」兩個字刪除咗，明志準備辭職。

　　其實大家心裏面都非常明白，留低又好，唔留又好，只不過係一個政治表述，對立法會當前大局影響真係唔多大，因為政府現時要過乜嘢議案，都係一樣可以照過，反對派能夠做嘅只係拖得就拖，同加多把反對聲音，等你過都無過得咁易。所以話泛民要留守議會陣線，美其名就係要喺政府體系之內監察政府，但實際上，唔留任的話，明年先舉行嘅立法會選舉會唔會成為被DQ理由？真係無人知道。站在泛民立場，留任係明智之舉。

　　雖然係一個政治表述，但對於非建制派來講，的確係將咗反對派一軍，無論係留定係唔留，都只會係輸家，正如Tina前文所講，就係除非泛民能夠一致行動，齊上齊落，先可以將對佢地嘅損害減到最低(呢個亦都已經係無可能)。原因好簡單，選擇留守嘅議員，背後好多人(包括激進派同建制)會製造輿論話佢地係戀棧份糧同政府資源，令支持激進派嘅選民更唔喜歡泛民(建制KOL已經總動員喺呢點造文章)；選擇離場嘅雖然未至於會被泛民支持者唾棄，認為佢地連最後一險都唔肯守，但就好易被政府歸類為「攬炒」、企圖癱瘓政府運作，可能出年都係逃不過DQ命運，選都無得選，空有支持者都無用。其實最終效果都係會造成反修例運動以來「大團結」出現裂痕，對選舉結果係點咁早難以研判，但Tina相信，站在建制派立場，點都好過原先安排好下個月選，所以我先會話，今次「延任」，泛民肯定係有輸無贏。