之前Jenny講過年年都會好留意「傑青」嘅消息，事關叫得「傑青」，顧名思義年青有為啦，如果畀Jenny識返一個半個做Friend子就正啦！嗱，Jenny就收到風，傑出青年協會今日搞咗個「明日領袖選舉2018」活動，梗係要咋咋臨去睇吓啦！

八位卓越獎得獎者，由左至右，葉嘉玟、黃悅、張穎研、吳嘉正、梁筠宜、梁孝聰、莊恩盈、冼嘉穎

　　咩係傑出青年協會呢？大家可以當係港姐「慧妍雅集」嗰類型嘅東東嘅，所以Jenny本身都好期待可以見到劉華同陳慧琳㗎！可惜答案係：冇嘅！而呢個「明日領袖選舉2018」，主角亦都唔係一班「傑青」，而係一班「傑少」噃！

今日「傑少」明日「傑青」？

　　原來呢個活動係畀一班中學生參加嘅，目標係訓練佢哋嘅領導才能同埋多方面發展。個活動都有成300幾個中學生參加㗎！最後得獎嘅就有8位同學仔。Jenny睇住呢8位同學仔，唔知佢哋係唔係就係以後嘅「傑青」呢？

　　拎得獎，睇嚟呢幾位同學仔都見慣大場面，對住行家訪問亦唔會緊張到口窒窒噃！雖然佢哋來自唔同學校，有傳統名校，亦都有地區中學。Jenny就發現，有位講嘢好有ABC口音女同學Kelly，講起廣東話就有啲緊張咁喎！

ABC都話要學好廣東話

　　原來Kelly本身係讀國際學校嘅。佢同Jenny講，覺得喺香港唔識講廣東話，以後就好難做嘢、好難識新朋友，雖然以前自己都有睇開電視劇學廣東話，不過都係覺得語言係要多講、多練習先得，所以好開心參加咗呢個活動，可以有好多機會練習講廣東話同埋識新朋友，仲拎埋獎添！Jenny都覺得，喺香港學好兩文三語都真係好重要，即使其中一樣好叻，都唔應該覺得學其餘兩樣係「Waste Time」，話晒都係香港嘅語言政策目標嚟㗎嘛！