喺立法會一講起「葡萄」，相信唔少人都會諗起「葡萄乘淑儀」，不過今日Jenny喺立法會，就見經民聯嘅梁美芬（Priscilla）大派真．葡萄（即係提子），唔通佢想同葉劉喺葡萄界爭一席位？

你要唔要食一粒呀？

　　Priscilla仲問立法會餐廳借咗架餐車，推住成車提子請行家食。佢似模似樣咁介紹唔同品種，仲話自己最愛食香印青提，一串要成幾百蚊，分開嚟計要十幾蚊一粒㗎！而喺佢身邊嘅黨友張華峰（肥老闆）好明顯急不及待喇，Priscilla一介紹完就率先伸手拎返粒嚟食先！

共阿爺的回憶

　　Priscilla同小妹講，自從佢睇咗大台嗰套關於果欄嘅電視劇之後，有時都會想去果欄行吓，一行就行咗成個下午，原來佢細細個嘅時候都住過一排油麻地，佢爺爺以前喺果欄附近有間鐵舖，爺爺仲成日都會去果欄買成箱橙返屋企食，而家行返果欄，可以重溫吓細個嘅回憶、又可以回味吓套劇喎！Priscilla講到咁興奮，唔通佢已經代入角色，當咗自己係陳煒？如果Priscilla係迷上近排熱播嘅《深宮計》……嘩！咁咪不得了？！