30/07/2015
幾長命 有樣睇
不少都市人都憂鬱,但她的憂鬱原因,則因為睇相佬話佢唔過得七十,咁已經騎呢,又照睇呢個相士都不甚稱職,咁就簡直冤枉!
事緣一朋友的母親差不多七十歲時,朋友話不如攪個七十大壽宴,亞媽竟然喊出黎!原來從前有個甚麼「生神仙」之類,在社交場合贈了她兩句,說她七十歲壽元即盡,她多年來銘記於心,七十將屆,已經忐忑,偏偏其鬼佬退休飛機師老公又唔識撈,一天kiss her goodnight時順便說:「Honey!你好快生日囉喎,好似有個相學家話你唔過得七十喎!哈哈哈。」
佢以為好幽默,咁滑稽嘅事,一定冇人信架。你知鬼佬專住鬼屋,天不怕地不怕,真係戇姑爺!至令她又氣又愁。
我說這伯母愁得冤枉,是因為就相學而言,壽元這回事,不好一口咬死。看有幾長命,最大路是看耳朵、人中和下庭(即臉部鼻頭以下的部分):
a耳朵長、耳朵大、有耳珠者多長壽。耳愈長、耳珠愈大愈厚,愈是壽相。
b人中愈長愈高壽,當然不可有破紋。
c下庭要有力,例如①方型面、或②下庭飽滿,例如圓型面,或兩頭戥得穩的相皆壽相。①有骨、②有肉、都可享長壽。
以此等標準來評伯母的相,第一關已經絕冇問題,她那常常配戴不同寶石耳環的耳朵,有一大片耳珠,每天閃閃生輝,真係盲嘅都睇到!人中、下庭亦中規中矩。唔通相士弱視,還是伯母的相變好了?
那年伯母好愁的時候,我特地請她吃了一頓飯,拍心口保她過七,還說過八都冇難度,她如今已八十二,still going strong!
這故事教訓有二:第一不要求求其其叫人贈兩句,你又唔知人功力、又唔知人涵養。原來我那伯母當日年少輕狂,相士說了幾句,她便面露懷疑之色,而且句句頂到行,不過她回家想下想下,又覺得有D野幾有道理噃,可能當日激親相士,他要用這五雷轟頂的預言來攝服她。咁佢就係自己攞黎啦,人地行走江湖,你何必當面噴人呢?第二,有職業道德的玄學中人,不會明言壽元何時終止,應該提示那一年有一個關,要小心那一方面,因為life span這回事,有許多因素可以影響,包括有沒有經營健康、管理情緒、行善積德……等等。
人會變、相會變、命運會變,壽元會變!何必因為人家一句戲言(或氣言),驚足幾十年!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票