08/09/2017
首置上車盤的「伏」
林鄭下個月就會公布佢第一份施政報告,通常施政報告之前一個星期,傳媒就會開始「漏風」,講吓有咩新政策。但今年中秋未到,呢方面就真係「行船爭解纜」,早足一個月就有傳媒爆料,話林鄭計劃推出首置上車盤,畀未買過任何物業嘅市民,可以用「超抵價」上車。
爆料都唔緊要,奇就奇在,林鄭竟然公開回應呢個新政策,而唔係喺施政報告至講出嚟;睇得出林鄭係非常心急想交功課,想喺正式公布之前,就將首置上車盤呢個政策好好咁喺社會討論。政策一講出嚟,市場大致都係唱好,特別係一班無殼蝸牛,一聽到話可以五折上車,個個都準備可以笠到個殼,但實情呢個政策有無「伏」呢?
首置上車盤唔係咩新思維,好早已經有人提出過,其實係類似想當年嘅「夾心階層住屋計劃」,或者係曾蔭權年代嘅「置安心」咁,都係針對一班上唔到居屋又買唔起私樓嘅一群。不過,首置上車盤傳聞中嘅折扣更大、限制更多。林鄭今日重新包裝,其實只不過係舊瓶新酒;計劃本身係好事,我都相信林鄭係以好心去做,但好心又會唔會變成做「壞事」呢?
首先,市場上究竟有幾多人或者幾多家庭有資格申請?呢個要等政府公布,但Tina估計,呢個數絕對唔細,可能第一次推出300個單位,過萬份申請算係保守。政府要搵幾多地先滿足到呢班族群嘅需求?喺居屋都未能滿足需求嘅情況下,呢班族群又要抽幾多次籤、等幾多年先買到首置上車盤?
跟住就要問一問,有幾多申請人係有真正需要?計劃嘅初心,應該只係針對嗰班無能力上車嘅「後生仔」,但要定下年齡線應該會引起極大爭議。Tina估計最終只要係某個收入Range入面,不論年紀就可以申請;而呢個簡單條件之下,好有可能,一班本來有能力上私樓或者本來屋企人有能力幫佢地上私樓嘅,都會去爭首置上車盤,咁呢個計劃嘅初心,又達唔達到目標呢?
最吊詭之處,係政府連資助房屋地都唔夠,又點搵到地去起上車盤?所以有風吹出嚟,話林鄭打緊一眾地產商嘅農地土儲。大家又試下用地產商思維諗一諗,如果你有塊農地想改規劃起住宅,政府同你講要有部分起上車盤先可以批,作為地產商你起唔起?私樓部分賣600萬,隔籬上車盤就賣300萬,會有幾影響銷情?呢個「伏」,地產商會咁容易中?好難喇!
《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。
【與拍賣官看藝術】常玉作品屢創天價,背後其實藏著跌宕起伏的人生► 即睇