九龍西補選剩返3個月，民主派嗰邊，原議席擁有人劉小麗就繼續孖住李卓人落區跟議題；而建制派竟然有別於以前，到而家都未公布今次補選嘅「真命天子／女」係邊個！

　　不過建制派嘅心思點會咁簡單，之前出現過話有意選、疑似會選、被人推出嚟選，閒閒地都有幾個名，但係經過前食衛局局長高永文（高醫生）話唔GO、自由黨李梓敬話唔選，淨返經民聯梁文廣，同埋「繼承」高醫生嘅陳凱欣（阿欣）。

「健康大使」風頭無兩 殯儀館後掛Banner

　　梁文廣之前一直都話建制未有最終協調結果，阿欣就淨係話「諗緊諗緊」，不過心水清嘅九龍西街坊，相信都會見到阿欣呢排曝光率急升，皆因做咗「健康大使」，周街都掛滿大大小小嘅大頭Banner，仲開咗個新Facebook Page日日更新添！

　　而梁生上一個Facebook Post都已經係13號，疑似係讓路畀阿欣咁噃！話口未完，又有網民發現阿欣個大頭Banner喇！仲要係巨型版，掛咗喺一座好高嘅大廈外牆，相信成公里外都會見到！其實Jenny同好多行家都係等了又等，只不過係等阿欣開金口講一句：「我參選喇」啫！不過見阿欣咁多搞作，都同真係宣布咗差唔多嚕，咁又有個問題喇！一旦宣布參選，競選經費又計唔計埋而家呢啲呢？

小麗呻無錢 望Poster獲街坊借位放

　　至於小麗嗰邊自然係冇咁多資源，Jenny就見小麗個小編噚晚就出咗個Post，話「今日大家都睇到保皇派有幾多錢！在紅磡世界殯儀館後面，出現了一幅高牆。我哋唔夠保皇派咁多錢，所以要抗高牆，就要更多小市民集氣。」網上呼籲希望大家可借出小小嘅宣傳位畀佢哋貼Poster喎！以密食當三番嘅戰略，可唔可以撼動到建制派強勁嘅資源呢？睇嚟要3個月後先知喇！但係Jenny睇住呢兩位女士喺唔同途徑互片，突然就諗起一句歌詞：「女人何苦為難女人！」不過，現實終歸現實，唔互片就冇選舉氣氛啦！