泰國係唔少港人嘅旅行勝地，而講起泰國嘅銀行，一定第一時間諗起當地第一大銀行盤谷銀行！唔講可能大家唔知道，盤谷銀行同香港其實都有啲淵源。泰國華僑出身嘅行會召集人陳智思（Bernard），佢家族喺泰國嘅祖業就係盤谷銀行，而銀行董事長陳有漢就係Bernard嘅叔父，喺泰國非常有頭有面。

Bernard奔喪 缺席所有慶回歸活動

　　可惜，噚日Jenny收到Bernard傳來嘅消息，佢叔父前晚過咗身，享年85歲…….Bernard話，喺星期四就會陪佢爸爸去泰國，幫手搞叔父嘅身後事，所以就會出席唔到七一回歸嘅活動。

　　盤谷銀行係Bernard嘅祖業，由佢阿爺陳弼臣同朋友一齊創立，所以Bernard嘅Daddy陳有慶，同埋叔父陳有漢兩兄弟讀完書都有返銀行幫手，數十年間令盤谷銀行成為全球知名嘅銀行。

Bernard叔父陳有漢係泰國知名嘅傑出銀行家。

陳有漢於港就學 曾膺3次泰國傑出銀行家

　　家族可謂一門多傑，陳有漢喺香港同英國讀書，之後就係蘇格蘭皇家銀行度做實習。1959年返盤谷銀行，八十年代出任總裁呢個位，之後仲做埋董事長，亦都拎過3次「泰國傑出銀行家」稱號。除咗幫手搞家族生意，陳有漢都有涉獵政界，曾經做過泰國上議院議員、國會顧問。

　　陳氏一家喺泰國有咁高嘅成就，所以陳有漢離世，旋即成為泰國報章嘅主要新聞。泰國國王亦對陳有漢逝世感可惜，決定授予佢下葬前享有皇室遺體沐浴儀式，足見佢喺泰國嘅地位有幾高！按當地習俗，由噚日開始至到今個星期日，一連7日每晚7點都會為佢舉行天主教追思儀式（Catholic Mass Ceremony），而喪禮就定咗喺下星期一在Holy Redeemer Church舉行，之後喺陳氏家族嘅墓園下葬，所以雖然Bernard身為行會召集人，但都冇辦法，要缺席今年嘅七一慶回歸活動了，Jenny深信林鄭一定會明白Bernard的苦衷。願Bernard同埋佢嘅家人都一切安好，節哀順變。