17萬公務員加人工喇！話說薪酬趨勢調查委員會，今日公布咗今年公務員扣除遞增薪點後嘅加薪幅度淨指標，建議低層公務員加薪2.84%、中層公務員加薪4.51%、高層公務員加薪4.06%。人人都希望加「薪」唔加「辛」，但個個都加薪，唔通個個都可以唔加「辛」咩！

(iStock圖片)

加薪要扣「跳Point」

　　不過睇落去，低層公務員得2.84%，其他公務員就有4%以上，似乎就唔太公平，但原來未扣遞增薪點，低、中、高嘅加薪幅度分別係4.89%、5.63%同埋5.25%。咁點解要扣遞增薪點呢？等Jenny話個小知識大家聽啦，公務員有一個自動增薪機制，就係俗稱嘅「跳Point」喇，即係未到頂薪點嘅公務員，每年可以增加一個薪級點（都係加人工嘅一種啦），直至到達頂薪點，所以政府為咗唔好雙重加薪，計呢個加薪指標嘅時候會先扣咗「跳Point」個百分比先。

　　而今年低、中、高「跳Point」開支，分別係2.05%、1.12%及1.19%，因為有愈來愈多新人加入政府拎鐵飯碗，所以低層公務員嘅「跳Point」開支就大啲、扣得多啲，得返個數就變咗2.84%。咁低層公僕咪好慘豬？放心啦！政府一向有個慣例，就係低層公務員會同中層公務員嘅加薪幅度睇齊，所以低層公務員有機會拎咗「跳Point」金額之餘，加薪幅度仲係4.51%，其實係幾和味㗎！

林鄭班子樣樣都要「新」公僕點會唔加「辛」

　　不過，據Jenny所知高級公務員職方就覺得扣減「跳Point」呢個做法唔太合理，會壓低咗公務員薪酬，影響士氣。高級公務員協會主席黃孔樂覺得個加薪幅度都OK，但就建議政府考慮就扣「跳Point」封頂，限於總指標的十分之一，咁就Very Good 喇！

　　話晒公務員係鐵飯碗，就咁睇加薪幅度又唔差，難怪而家有咁多後生仔一畢業就話要考政府工喇！薪趨會主席黃錦沛都話，因為今年個經濟同營商環境，都有正面增長，今年個幅度幾好。咁唔知啲私人公司會唔會都照跟呢？身為商界代表嘅自由黨黨魁鍾國斌就覺得唔會影響商界，佢同Jenny講，政府同私營機構兩者嘅生態環境唔同喎！私人公司有花紅、有雙糧等等等等，公務員就Sell穩定同埋人工高。唉！Jenny身邊唔少Fd子都冇4%呀！不過作為打工仔，無論係打政府工定李生工，最希望都係加薪不加「辛」，之不過計Jenny話，而家林鄭班子開宗明義要推「新」管治、多啲「新」思維，廣大公務員想不加「辛」都幾難喇！