香港電影金像獎今年有唔少金句，尤其係楚原叔嘅得獎感言更加係洗晒版。但對頒最佳編劇獎嘅黃秋生來講，佢畀人瘋傳嘅「金句」，就可以講係被人屈咗一鑊，所以嬲到要喺Facebook貼文澄清，大鬧「某網媒」同「某網咖」惡毒，同埋向被捲入事件嘅成龍道歉咁話。但係攻擊又點會停，令Jenny最佩服嘅係秋生覆網民留言嘅智慧！識睇一定睇留言。

秋生話意想不到，佢嘅講辭播出後市民反應同各方報導，竟將原意完全扭曲！

瘋傳「加料版講辭」 網民集體「撞車」

　　話說黃秋生頒獎嘅「加料版講辭」當晚忽然喺網上瘋傳，網民大讚佢夠薑暗串而家已經貴為政協嘅成龍云云……點知全部集體「撞車」！秋生根本冇講過「加料版講辭」入面嘅嘢！無啦啦畀人屈，真係好難唔嬲囉！係咪先？

　　事件就發酵咗兩日秋生終於喺Facebook貼文，大鬧「沒有最荒謬，只有更荒謬。」話「曼德拉效應」出現咗喺自己身上喎！秋生話，自己根本冇講過「早前有個政協，大聲在北京說，再沒有香港電影，只有中國電影，此人今晚出席香港電影金像獎，不知他代表中國電影，還是香港電影？」仲話自己段講稿度咗成個星期，亦都交咗畀金像獎大會過目，當中並冇修改過。他自謙自己雖然不才，都冇可能喺公開場合侮辱前輩，所以於禮上都係應該出來說明說明，要同成龍大哥道歉。秋生仲藉此事，重申重申再重申自己係唔支持港獨，「香港是中國的國土，保衛釣魚台我也去過，這點是不用置疑的」。

秋生真身串爆回留言 

　　有啲網民唔知係唔係因為「撞車」而惱羞成怒呢？好似有人話點解要稱呼成龍做「大哥」？秋生答：「成龍大哥是一個稱謂，就好似成龍先生一樣。你想多了」又有人話好可惜以為可以從佢身上看到香港的光明，秋生答：「我不認同無禮便是光明」有人唔滿意佢簡體字回留言，秋生未驚過直接答：「我簡體比繁體好」。仲有人想笑佢：「現在才知偽新聞的利害？還是現在才自己感受到？」秋生串返轉頭：「你以前沒看新聞嗎？」

　　今次呢件事對廣大網民而言其實都係一個好大嘅警惕，凡事唔好人哋講咩就信，要思考真實性同合唔合理，唔好見到Juicy就不理究竟咁Share出去！咁先唔會助長假新聞同謠言！