「地下鐵碰著他～每天一樣的上班時間，在地下鐵中總會遇到幾個熟悉的面孔。熟悉的面孔中，我，總有幾個異性面孔特別深印象！有時偷望時不小心對上眼，心肝仔噗通噗通地跳了幾下，立即刻意又尷尬地將視線扯向你的附近，假裝我其實沒有偷望你。然後，為了那短促的對望，會心微笑。」醒啦好嘛？搭車巧遇男神，再發展成甜蜜情人？唔好FF太多啦！白馬王子影都唔見，但就一定會遇上幾種最乞人憎嘅打工同伴！

第一種：只掃門前雪女 

　　一聽就知呢種人係自私精！無錯，嗰班自己上到車，就企喺門口塞住晒；自己無意行入車廂中間，但又唔畀人行入去，無視後面班上唔到車嘅人嘅自私雪女！除咗上車事件，扶手一樣有雪女出現！雪女自己成功霸到好扶手位後，總會無視其他人扶唔扶到！佢哋好鍾意用掛住手袋嗰隻手去扶手，其他有幸可以捉到扶手嘅人，手腕不停被雪女個手袋拍打；而嗰班不幸至極嘅人，梗係連扶手柱都掂唔到啦！

第二種：人形馬路炸彈 

　　揸車最怕「馬路炸彈」，返工繁忙時間都最怕「人形炸彈」！窮苦又依賴公共交通工具嘅各位都知，繁忙時間嘅港鐵會故障(唔係，係人流管制先啱)！一條條沙甸魚落車後會化身鬥牛，齊齊向同一目標進發。而啱啱提及嘅人形炸彈，就會喺呢個千鈞一髮嘅情況下突然急剎，喺路中心縛鞋帶或者因為行錯路而變種為三文魚，逆流而上！而跟在佢後面嘅你，唯有「跳一跳掣」。就係呢0.01秒嘅跳掣，你後面嗰班趕住返工嘅鬥牛就會好似骨牌咁，齊齊「lag機」，甚至有啲「低頭牛」會反應唔切，撞落你到添！其實唔係話有突發事，唔畀佢解決，只係呀三文魚你可唔可以游埋一邊先處理你嘅事，唔好係路中心處理呢？

第三種：車神Sky 

　　有一種人，好憎慢過人，而佢哋被我稱為「車神Sky」。每次落車搭電梯，都係人性的考驗，你會遇到全身爛撻撻、看似做藍領嘅粗獷男有禮地到隊尾，再讓你行先；你亦會遇到西裝骨骨、斯斯文文嘅中環男企喺電梯口，等機會「sip」入人龍打尖，後者，就係IFC車神──Sky。當Sky哥哥打尖成功，就會進一步cut線，企喺電梯嘅右邊。代表乜啊？代表佢一啲都唔趕時間囉！只係為咗貪方便先打尖，仲要打完你尖好似勝利者咁企喺你面前「得」住你！雖然我都唔趕時間，但為乜我守完紀律仲要受你氣先？