大家多少都知我係流住阿根廷嘅血，嚟咗兩個星期，我一直好留意巴西人對阿根廷嘅睇法，想知道佢哋兩隊世仇之間究竟反面到咩程度，而《晴報》編輯哥哥更好奇問我，成日著住阿根廷外套周圍去，究竟會唔會畀人打？

巴西球迷其實對阿根廷上身嘅我好友善。

　　首先講自身安全問題，多謝大家關心，巴西人見到我成日阿根廷上身，通常有三個反應：一係唔理，見怪不怪；二係當我係阿根廷人咁打招呼：「呀珍天那？！」三係表示不屑，畀隻向下嘅手指公我，不過通常塊面都係有笑容嘅，只要我即刻畀番隻向上嘅手指公兼嗌番句「拔蕉！」，咁就會識多個朋友嘞！

　　其實論國力，兩國根本蚊髀同牛髀，兩億人口嘅巴西係南美大佬，佔咗南美一半咁大，阿根廷得個四千萬人，國內經濟又差，本來就唔應該放佢在眼內，巴西之所以成日當佢係眼中釘，全因為一個波字！

　　我響巴西電視睇過幾個節目同廣告，都係恥笑阿根廷人，就類似每個課室入面都有個畀人玩嘅同學仔一樣。巴西人想笑，就攞阿根廷人嚟玩，其中一個廣告仲係阿根廷球王馬勒當拿粉墨登場，扮演一個好煩好多嘢講嘅燈神，講講下啲人嫌佢煩索性變走佢，全場靜晒！難得老馬又肯做埋一份喎！可能係佢有幽默感，當然更可能係錢！

　　史上從未有歐洲隊響美洲贏世界杯，所以坊間好多球迷都覺得有機會出現一場全南美決賽，家陣巴西順利A組首名出線16強，如無意外阿根廷亦會奪F組首名，分開線路作戰之下，呢對冤家唯一碰頭機會就係最後一場。如果有咁嘅一日，大家一定要睇下邊隊成為笑話啦！

轉載自晴報