常言道：有得揀，先至係老闆。朋友伴侶你有得揀，飯腳波友你都有得揀，偏偏朝見口晚見面，仲要一星期對足5日嘅同事你無得揀，而更加不幸嘅係，佢地分分鐘屬於以下8種人，令你反白眼反到上天花板！

1/ 小學雞

　　雖名為小學雞，唔一定年紀細。特徵係當有人交代佢做一樣新嘢，佢唔識 / 唔明都絕對唔會開金口問，唔問之後亂做實錯，做錯畀人鬧就話人針對佢，周圍呻有幾委屈，爭在未講：「你再xxx我就話畀老師聽！」阿生，成熟啲啦……

2/ 老Seafood

　　老Seafood十幾年嚟日日苦練內功心法：練精學懶，再配合各種外功，務求將工作量減至最低。最經典莫過於老細叫佢做嘢，佢唔識話唔識，識都扮唔識，搏繼續un腳唔使Do。

3/ 嘍囉

　　嘍囉扮大佬，老細都未出聲就諸多意見，一副領導人下達指令咁樣。講完一堆廢話之後，真大佬出現一句將佢KO。其他人心諗：唔好嘥我時間啦＿！

4/ 口水佬

　　自以為口才了得，開會時口水多過浪花，浸得死成村人。但內容人人都知空洞無聊膚淺幼稚至極，得佢自己唔覺。其實你出少句聲無人話你啞架……

5/ 大頭蝦

　　經佢手嘅嘢，啱都會改成錯，錯改完都係錯，所以就算之前Approve咗嘅都要Double check多次。同埋一定要備份，以免重要文件孤本下落不明。

6/ 遲到王

　　唔單只佢本人每日例遲，連交帶畀佢嘅工作，亦會係限期之後完成，令人懷疑佢是咪身處唔同時區而出現時差問題。久而久之，合作開的同事都會就下佢，自動將個限期講早少少。

7/ 三姑六婆

　　最鍾意打聽公司每個人嘅八卦，由工作、薪酬、學歷，到個人健康、感情生活、家庭狀況等等等等乜都問一餐，好聽就叫關心，唔好聽就叫查家宅。完全唔想答，但唔答又驚畀人話無禮貌……

8/ 老奉

　　明明大家平起平坐，但就成日點同事做嘢，仲要聲大夾惡。大佬，你邊位呀？無人應份幫你架囉！