07/08/2024
鄭中基發聲明稱患抑鬱靠酒精逃避現實!向太太及仔女認錯:去美國參加戒酒中心嘅療程
歌手鄭中基日前無預警在FB發表聲明,稱經理人道德操守出現問題,即時中止合作關係,直至前日鄭中基再次發聲明,指經理人何慶湘已經離職,公司將照常運作。由於鄭中基未有交代清楚事情的來龍去脈,昨日終於第三度發表聲明,承認跟酒精有關,對唔住太太及仔女。
鄭中基上周六突然FB發聲明說:「由於發現何慶湘工作及道德操守有問題,本人與機動娛樂立即終止合作,有關工作交接問題會另作安排。」由於事出突然,不少粉絲都大感驚訝,因鄭中基跟阿湘關係一直良好,實在估唔到會發生這種事。過往多日,不少娛樂新聞YouTube頻道都紛紛作出猜測,但就算昨晚鄭中基再發聲明,都未有提及所為何事。
昨午,鄭中基再次以長文解釋事件,原來「飛機醉酒鬧事」事件後,他再次因為酒精出事。鄭中基坦言在搞笑及有趣的背後,原來一直患有抑鬱症,曾經服藥治療,但他後來再次依賴酒精減壓,他形容「壓力終於爆煲」、「好對唔住我太太同仔女」,更揚言會戒酒。他的內文如下:
大家好。
早前我發咗一個關於我公司同埋我健康嘅聲明,引起咗好多朋友嘅關心亦引起好多嘅猜測。基於公司嘅事情係會如常運作,希望可以好好咁處理再次交代,唔想影響太多人。
今日我想講一下我自己嘅問題。大家平時見到我大癲大肺、拍搞笑戲、開channel拍片、開演唱會,表面上好似無嘢咁。其實咁多年黎我都仲係一個唔識得面對壓力同埋唔成熟嘅人。仲記得2000年我因為喺飛機醉酒鬧事,引致好多我嘅fans失望,仲有影響到我嘅家人,後來我決心戒咗酒,想要做一個清醒嘅人。之後喺無向公眾交代情況下,我經歷咗一段好短嘅婚姻,呢段婚姻令到我好唔開心,亦好好咁反省過自己嘅問題。
直到我遇到我太太余思敏小姐,係佢令我覺得我要走入另一個人生階段嘅人。我哋一起組織咗一個家庭,有兩個小朋友,喺一件好幸福嘅事。
但當面對壓力、面對工作、面對人嘅時候,原來我自己嘅問題係無徹底解決到,好多嘢我都未能做到好好去溝通,好多嘢我都無處理好,令家人失望。
喺搞笑、娛樂大家嘅背後,係朋建議下去咗睇醫生,發現咗有抑鬱症,當時靠食藥控制,然而我再次做咁個錯誤決定,選擇咗飲酒去逃避現實,太太都有同我講,我係自己呃自己。壓力終爆煲,用咗呢幾日時間好好反省自己,工作忙唔係藉口,唔識溝通就要去學識溝通,我覺得好對唔住我屋企人,尤其是我太太同仔女,對唔住! 我會用時間同行動去證明我會努力做好丈夫、爸爸同鄭中基既呢個決心。
接下來我要去解決自己同公司嘅問題,我完成手上嘅工作後,會去美國參加戒酒中心嘅療程,都50幾歲嘞,我要去諗清楚點樣去面對自己,然後先可以面對大家,我希望返黎之後可以做一個更好嘅自己。
呢幾日佔用咗大家嘅時間同埋媒體版面,好對唔住,我希望自己嘅問題真係可以自己去解決,多謝。
鄭中基先後有兩段婚姻,先是跟蔡卓妍5年「隱藏」婚姻,隨後,2011年跟任職娛樂新聞主播的余思敏未婚懷孕,兩人結婚後育有一女一子,如今囡囡Emma已經13歲,囝囝Evan則9歲。鄭中基曾透露Emma相當有表演慾,所以上次演唱會,鄭中基都安排Emma上台父女合唱,非常溫馨。
轉載自: 晴報
【你點睇】當局擬放寬九龍東商業區土地用途,有議員認為應推廣至全港都開放些少,你是否認同?► 立即投票