今日中大校長段崇智就出嚟同學生面對面傾吓偈，不過場面望上去就唔係好和諧啦，班學生Full Gear以待，又戴頭盔、又戴口罩咁，Jenny差啲以為去咗抗爭現場添！原來係班學生向段校長抗議佢53日都冇出過嚟見人喎，希望可以令校長明白學生運動嘅前線情況。

段校長帶你太空漫遊

　　唔知段校長係咪收埋自己太耐呢，對住咁多人好似唔太放得開，上半場就不斷咁打官腔，面對學生多次追問：會唔會向政府公開呼籲成立獨立調查委員會？都係咁遊花園，只係答會持開放態度，重申下有建議成立中立平台喎。咁答法，同學緊係唔收貨啦！不斷嗌「講人話」、「唔好做錄音機啦」，不過照Jenny咁睇，段校長，你都有幾分做官嘅潛質喎！有冇考慮下做下屆教育局局長呢？

「你食咗飯未？」有玄機

　　喺尖銳問題此起彼落之間，突然有同學仔就關心段校長嘅生理需求，問校長食咗飯未，校長今次終於冇遊花園，好乾脆咁答：「未呀！」。做咩同學仔突然咁有校長心？原來係同學仔想確認吓校長仲有冇直接答問題嘅能力。段校長同學生交流咗咁耐，不停咁帶班學生遊花園，遊到上外太空咁濟，同學仔當然要關心吓段校長耍咁耐太極餓唔餓啦！

搞手難做 分分鐘校長變Free Rider？

　　段校長就不斷話有建議成立中立平台，有學生就問段校長會唔會拋個身出嚟做搞手！講呢樣，Jenny有最深切體會，搞手真心難做，約得呢個就嗰個唔嚟，約好時間，又有人忽然甩底！段校長冇講到好實，就話會諗吓。小妹希望段校長如果有心做，就唔好得個講字啦，做Free Rider神憎鬼厭㗎！