今日係立法會新春午宴，仲邀請咗特首林鄭、一眾行會成員同埋政府高官出席。通常呢個時候，民主派都會有幾個名喺度，有啲真係趁食飯同啲官溝通，有啲就趁機入去示威，就好似上年4月范國威就趁住中聯辦主任王志民出席立法會午宴，報名入去送畫畀佢！而上次11月立法會宴請林鄭嗰時，公民黨郭榮鏗仲抽中同林鄭同枱，佢話反映咗有關美國收緊對港政策嘅事。Jenny今日就一心去睇睇民主派有咩搞作，點知……

平平淡淡……完了

　　以前都仲有啲出位少少嘅議員特登入嚟示威，Jenny仲諗緊今日會唔會都有呢？不過當小妹收到今日嘅報名名單，數數啲名，發現一個泛民都冇份噃！唔通係因為最激嗰啲議員，都已經被人DQ晒？定係因為新正頭，大家都未放完假呢？

　　立法會秘書姐姐就話畀Jenny知，其實就算冇報名參加，啲議員Walk In都可以㗎！之但係Jenny由頭等到尾，又真係一個民主派議員都見唔到，連官員入場時嘅示威都唔見，宴會就喺呢個咁平淡嘅氣氛下完咗嚕～

入OR 唔入？ This is another question！

　　作為宴會常客嘅民建聯主席李慧琼（琼子）就喺會後話，泛民同事缺席今日同埋聽日中聯辦搞嘅新春團拜，係失去咗同政府同埋中央嘅溝通機會，又話中聯辦宴請立法會議員嘅緣起係上年立法會宴請咗中聯辦主任王志民到立法會午宴，嗰次民主派都有部分成員出席，今次中聯辦回請立法會，佢哋卻唔出席，有啲唔公道喎！

　　而民主派就話，唔覺得呢啲宴會可以起到乜嘢實際嘅溝通作用，尤其喺中聯辦入面，有成幾十人嘅茶聚，可能連「風花雪月」都做唔到，又話民主派嘅意見已經喺好多地方表達過，政府都係唔肯聽民意，尤其係喺提高長者綜援申領年齡，同埋最近要修改逃犯條例呢件事上，今日就實在做唔到同林鄭「把茶言歡」喇！

　　唉，Jenny就唔知咁樣公唔公道，淨係見到而家行政立法關係，似乎又回到最初的起點了。大家諗下吖，入中聯辦就畀人話「賣香港」，唔入又一句民意都反映唔到，點都會中箭……如果小妹係民主派，就真係寧願一動不如一靜喇！