千呼萬喚始出來！除咗土地供應專責小組份報告之外，仲有前幾日Jenny講完等到頸都長嘅「補鑊四千」，今日終於公布詳情喇！申請完拿拿臨有錢落袋，梗係比土地供應更短期見到效果，唔怪得Office人人都問Jenny詳情係點，小妹從來唔自私，而家一次過話畀大家知！

　　話說上年份《財政預算案》被人鬧「孤寒」，派糖得嗰少少，政府唯有派錢「補鑊」，整咗個「關愛共享計劃」，宣布向每個合資格市民派$4000，但就需要申請。點知宣布完之後，就冇咗聲氣，講來講去都唔知個詳情、又唔知幾時有錢落袋。

　　終於！終於！終於！就喺2018年最後一日，市民收到呢份「新年禮物」喇！Jenny好感動呀！

下年2月有得申請 6個條件你要中

　　先購幾時可以申請先！Mark低喇！時間就係出年2月1日起去到4月30日。係咪只要有身份證就有錢攞？NO！NO！NO！睇埋下面6大資格你符唔符合先啦！

—）2018年12月31日或之前年滿18歲；

二）持香港身份證（包括新來港人士，但不包括來港工作、求學或接受培訓的香港非永久性居民及其受養人，也不包括以訪客身分來港的人士）；

三）通常居住在香港（但不包括已移居海外的人士）；

四）沒有受惠於2018至19年度《財政預算案》就綜合社會保障援助、長者生活津貼、高齡津貼或傷殘津貼發放的額外兩個月款項；

五）無須繳交2017／18課稅年度的薪俸稅；以及

六）在香港沒有物業。

　　另外，持物業但無需交稅、差餉寬免不足4000元；薪俸稅退稅若少於4000元；及獲「三糧」的社會保障人士不足4000元者，均可獲補差額。

38971088！Call 佢 吖！

　　就咁睇文字，大家明唔明？有唔明唔緊要！遲吓會有電視同電台廣告，政府發言人同Jenny講，職津處將會用唔同渠道宣傳計劃嘅申請資格同安排，好似搞簡報會、又會周圍派海報、小冊子咁。仲有咩唔明？放心，可以打24小時熱線38971088！Call 佢 吖！

講咗咁耐，邊度拎表申請先？

　　政府都好貼心，為「補鑊四千」整咗個專頁（https://www.wfsfaa.gov.hk/careandshare/tc/index.htm），入到去就可以下載申請表，或者去到民政事務總署各區民政諮詢中心、在職家庭及學生資助事務處轄下及學生資助處或在職家庭津貼辦事處（職津處）拎表。　　　

　　在此，Jenny亦趁機祝大家新年快樂，來年荷包常滿。祝願香港政通人和，小妹工作都輕鬆啲。