作為女性，唔同年紀都可能有唔同嘅「滲漏」煩惱。新民黨主席葉劉淑儀雖然望上去保養得好好，其實數數手指都68喇，呢排有人就發現佢好似準備搞返個「滲漏講座」幫下姊妹們，仲好Warm咁用埋隻好Girly嘅粉紅色做Banner主色，個標題隔離仲有一滴Pink Pink嘅水滴添！Jenny一望，心諗睇嚟返去問下媽媽有冇需要都好喎！網民見到似乎都Get到啲嘢，笑葉劉係唔係搶添寧代言人盧宛茵飯碗添！

望見嚇一跳 然後得啖笑

　　睇真啲，原來葉劉搞嘅係「樓宇滲漏講座」！唔係大家諗嘅嗰樣嘢呀！不過葉太一身Pink Lady裝束，同埋隔離位社區主任嘅白色衣著，睇落去就好似婦科醫生廣告咁款，再加埋「樓宇」二字用埋深粉紅底框起，唔細心留意都真係好易走漏眼！

　　呢條Banner一出，就洗咗今日個Facebook版喇！不過唔理大家係恥笑又好、驚訝都好，起碼都令人記得新民黨嚟緊會有個「樓宇滲漏講座」舉行吖！Jenny覺得至少呢個宣傳係成功嘅！話唔定葉劉就係睇準自己呢個Selling Point，特登度身訂造添吖！你話一班「懶正經」嘅民主派點夠玩？