新會期開咗成個月，絕大部分委員會都已經選晒主席。不過跟進橫洲發展項目事宜小組委員會就今日先開本年度嘅第一個會，由於有議員提出想再選過主席，所以第一個議程就進行主席選舉先。

廸廸仔記得多謝柯仔嘅加持！

廸廸仔可謂橫洲代言人

　　講起橫洲，相信好多人都同Jenny一樣會諗起議會陣線嘅朱凱廸（廸廸仔），話晒當年廸廸仔因為揭露新界「官商鄉黑」，連人身安全都受到威脅，需要警方24小時保護。所以講起橫洲，好多行家都第一時間諗起廸廸仔，搵佢講幾句。

　　而相信民主派一樣有呢個共識，一講到選橫洲委員會主席，本身主打房屋嘅民主黨尹兆堅就提名由廸廸仔做主席；建制派方面，自由黨邵家輝則提名工聯會麥美娟（Alice）連任。當時會議室就啱好有8人，包括民主黨尹兆堅、公民黨郭家麒、熱血公民鄭松泰同埋朱凱廸，建制派嗰邊就有麥美娟、民建聯柯創盛、自由黨邵家輝同埋建測規園嘅謝偉詮，啱啱夠小組委員會法定人數。而邵家輝唔知係唔係擔心建制派唔夠票，就問選主席時會唔會有鐘聲提大家返嚟投票，不過當時嘅主席Alice就同佢講返選主席唔會有鐘打，而且又已經夠人開會，所以唔使點人數。

打和都冇得Super 抽籤決勝負

　　睇返個場，民主派嗰邊有4人，建制派又係有4人，大家都估到個結果會4比4打和喇！但係主席冇得兩個人做，最後要抽籤抽出新主席誰屬，結果都唔知係因為副主席柯創盛（柯仔）係「臭手」（即係二揀一永遠都會失敗），定因為廸廸仔嘅運氣強勁，所以由廸廸仔當選。

　　不過到選副主席嗰陣時，經民聯嘅石禮謙就已經返到會議室，所以喺建制與泛民5對4之下，柯仔就連任副主席，冇得玩抽籤嚕！Anyway，今次廸廸仔成功「凍蒜」，記得多謝柯仔嘅加持喇！