新地(00016)前主席、帝國集團創辦人郭炳湘今早舉行喪禮後，下晝喺中環聖約翰座堂出殯，正式走完其如戲劇般嘅一生。郭炳湘生前8位好友負責扶靈，包括長和(00001)主席李澤鉅、信置(00083)主席黃志祥，恒地(00012)主席李兆基的左右手林高演、82歲合和(00054)主席胡應湘、港協暨奧委會會長霍震霆、鷹君(00041)主席羅嘉瑞、地產及建造界立法會議員石禮謙以及蘇洪亮。

兄弟縱曾鬩牆 情誼始終未卻

　　三弟郭炳聯喺回憶錄入面話，對大哥太早離世感到傷感，會永遠懷念三兄弟之間嘅情誼，仲強調郭炳湘永遠係佢嘅好哥哥。而仍然喺獄中服刑嘅二弟郭炳江就話從來都咁愛大哥，仲喺悼文入面透露，直到上星期五，即係10月26號，細佬郭炳聯去獄中探望，知道大哥過咗身，成個周末佢都被悲傷包圍：「Sadness engulfed me that whole weekend, I prayed for my brother and on Saturday morning。」

　　恒基地產副主席李家誠話，過往與郭炳湘有生意來往，覺得郭生好願意畀機會後輩；遠東發展(00035)主席邱達昌就形容，郭生心地善良、心思細密，非常關懷別人。

國家領導人送花牌致哀

　　禮堂內布置好簡約，只係放咗家人送嘅花牌。不過作為郭氏大哥，郭炳湘生前喺政商界自是非常吃得開，所以教堂擺滿咗唔少重量級人物致送嘅花牌，例如國務院總理李克強、全國政協主席汪洋、中共中央政治局委員韓正及國務院副總理劉延東、仲有特首林鄭月娥、前行政長官梁振英、董建華、前人大委員長張德江所送嘅；商界當然唔少得地產界四大家族啦，仲有賭王何鴻燊及何藍瓊纓、前華置主席劉鑾雄、東亞銀行李國寶夫婦等。

　　望住教堂，忽然覺得任你再努力去爭、再有錢、再有權，死神一聲令下，還不是名與利冇一樣帶得走。Jenny諗起都覺得好唏噓。

國務院總理李克強、全國政協主席汪洋、中共中央政治局委員韓正都有致送花牌。

另一爭產劇隨時上演

　　之不過，一切恩恩怨怨係咪又從此隨風而逝呢？睇嚟就未必喇……

　　郭氏三兄弟08年內訌，對簿公堂。去到2013年底，郭老太鄺肖卿重組家族基金，2014年，三兄弟達成股權分配協議，郭老太持有55%，其餘三人均分。大哥郭炳湘同年離開新地，自立門戶創辦帝國集團，積極發展地產業務，短短3年間手執百億元計嘅土地儲備。

　　根據福布斯早前統計，郭炳湘身家約540億元。其中個人更手持市值逾200億元新地（00016）股份，佢同正印妻子李天穎有兩仔一女，又有紅顏知己唐錦馨。眼下最大問題就係，遺產點分配呢？Jenny就聽聞唐錦馨考慮緊尋求法律意見，睇嚟仲有下文……所以話呢，名門大族中人真係唔易做。