不認不認還需認，Jenny一早講過㗎啦！上月下嫁同黨前政策總裁袁彌昌嘅新民黨立法會議員容海恩（Eunice）噚日親證有喜4個月！預產期仲係明年農曆年初一！但就打死唔講係「豬仔」定「豬女」，話畀個機會傳媒估吓先好玩喎！

就咁睇，如果唔講，只係件鬆身裙出賣咗佢大肚婆嘅身份。

Eunice：好似玩足一日過山車

　　人地多數形容大肚婆係「粗身大細」，但今日Eunice同傳媒茶聚嗰時，見佢化咗淡妝，依然手纖腳幼，只得肚仔突突地，老實講孕味就唔算太濃。Eunice話晒高齡產婦，見佢仲瘦蜢蜢咁，Jenny梗係關心下佢啦！

　　Eunice就話而家冇特別戒口，魚生都照食，亦愈來愈鍾意食香口嘢，同飲汽水；可惜下午同夜晚最唔舒服，會冇胃口，成日食唔落嘢之餘，補湯之類都飲唔落。佢形容就好似玩完過山車之後，個肚同胃轉轉吓咁嘅感覺，但Keep住轉足一日，所以陀B以來，都冇增過磅，維持120磅水平。不過，Eunice就好樂觀，話5個月之後可能會出現「突變」呢！

緊貼潮流入媽媽谷

　　所謂靚衫唔嫌多，有咗BB一樣要Keep住Fashion同靚靚！但Eunice就同Jenny大呻香港難買靚款大肚衫裙，覺得唔少款式好老土，又話自己仲未適應行入BB用品舖揀衫，所以可能遲吓都係網購。為準備BB出世，仲同坊間好多準媽媽一樣，剛剛加入咗個名為「2月媽媽谷」嘅Whatsapp Group，同其他新手媽媽交流買BB用品資訊。

　　自由黨張宇人曾經話唔應該有產假，Eunice就話做人要與時並進，應該多啲產假同育嬰假。要Update嘅仲有人心呀！Eunice作為基督徒但未婚懷孕，唔少花生友都出言批評佢，佢就一笑置之，話由39歲開始出選議員，已經有生BB打算，香港是一個自由社會，「即使有（BB）定冇、結婚定唔結，都係可以分開睇」，今次40之齡有咗「都唔到自己揀」，而本來與袁彌昌已打算結婚，所以就快快手拉埋天窗，一次過KO所有嘢。

Eunice隨身帶住本《基本法》，唔通當埋胎教?

捧住個肚「留守到最後一刻」

　　爭取授權票應該就喺Eunice生B之前都唔會成事，咁Eunice會唔請「前4後6」呢？佢笑住咁話一放放10個星期假：「比人斬死呀！」所以會捧住個肚「留守到最後一刻」，只會放2至3星期假，希望宣布《財政預算案》嗰日復工。Jenny就覺得生B係開心事，邊個夠膽斬你，你師傅葉劉應該唔會放過佢囉！By the way，Jenny今日「成功爭取」，Eunice應承會親手派薑醋畀小妹啊！