今日係立法會補選提名期嘅最後一日，之前一直盛傳會俾人DQ嘅香港眾志周庭同埋姚松炎，一個就真係星期六被人「叮」走咗，一個就等到今日中午都仲未有消息，搞到九龍西嘅「Plan C」民主黨袁海文都要下晝去咗報定名先，以防萬一吖嘛！點知最初係DQ高危嘅姚松炎無事，以為會安然入閘嘅周庭就係咁先。真係要講句：點夠政府玩呢？

今次姚松炎入到閘，袁海文唔使再淆喇！

政府DQ調轉來玩 袁海文被玩得最透

　　其實今朝一早，消息靈通的人士已放行風，話姚松炎可能走得甩，仲用埋「死裡逃生」去形容，結果喺袁海文報完名過咗個零鐘之後，姚松炎就真係收到確認通知。

　　Jenny本身同大家一樣，初初仲以為會D姚松炎嘅機率大過周庭，所以九西先搞咗場大龍鳳！估唔到，原來政府呢排興調轉來玩，殺大家一個措手不及！

　　不過Jenny覺得今次被玩得最透嘅，唔係姚松炎，而係袁海文囉！事關佢話會喺報名之後留到5點，若選舉主任5點前宣布取消姚松炎嘅資格，佢就會即刻退選，結果袁海文當然要走多轉，去交退選通知書。Jenny估佢可能都諗緊，都唔知係唔係選舉主任睇住自己報完名之後就即刻確認姚松炎嘅資格，耍佢一鑊。如果政府選選下先話覺得姚松炎唔夠真心，DQ咗姚生，呢個伏就真係大到呢......

鄭若驊上立會被圍攻 錄音Mode On

　　話說DQ周庭嗰日，姚松炎已經公開咗選舉主任要佢答4條問題，睇來姚教授今次答啱題目所以「過關」。只不過雖然獲得確認，但係今次政府搞到咁「抆水」，令唔少人都覺得另有陰謀，所以噚日港大法律學院首席講師張達明都擔心政府會唔會確認完姚松炎嘅資格，但係選選吓先再被DQ，所以都建議姚避答敏感問題。

　　另一邊廂，醜聞纏身嘅律政司司長鄭若驊就去到立法會出席司法及法律事務委員會會議，大家以為個個都會問僭建？非也今日仲有另一矛頭，就係DQ周庭嘅理據！鄭司長無論僭建定DQ相關問題，都畀人拋窒咗幾次，好簡單嘅問題都答唔上，佢一於全程錄音Mode On，將所有嘢都話唔知、唔為意、要保密、一就推畀選舉主任，事實上咩都冇答到。Jenny仲以為佢會有備而來，會同議員刀來劍往一番，但望住鄭司長嘅表現，小妹只能搖頭嘆息。唉......