新任律政司司長鄭若驊第一日上任就被爆咗個僭建風波出嚟，都可以係話今屆政府開局以嚟最大嘅醜聞，仲要呢位新任律政司司長本身都有土木工程師資格添！Jenny真係好好奇，點解咁多官員都鍾意「玩」僭建嘅呢？唔通其實呢個就係做官嘅「必要條件」嚟？真係好玩唔玩喇！

今次真係考鄭司長智慧喇！

影「全相」有航拍機就得喇！

　　Jenny仲記得，當年嘅「唐宮風暴」就間接令唐英年冇咗特首寶座，嗰排啲行家日日喺約道7號門口捕住，仲Book埋「吊雞車」由上而下影落嚟，就係為咗張「唐宮」全相。Jenny企喺出面望住，都已經覺得好震撼！（聽聞當年有行家雖然畏高都頂硬上，上咗「吊雞車」，非常專業！）不過去到今日，要影「全相」唔使用「吊雞車」嘅，有部航拍機就得喇！話口未完，Jenny就見到頭頂有幾部機飛過喇！

帆哥去過大宅但唔知有景轟？

　　相信大家同Jenny都係一樣，正正係因為今次嘅僭建風波，先至認識司長嘅「先生」、前香港工程師學會會長潘樂陶。仲有行家摷出，當年為佢兩個做男方證婚人嘅，竟然係而家嘅運輸及房屋局局長陳帆（帆哥）添！帆哥仲話自己都去過潘生屋企幾次，不過就冇留意僭建問題咁話喎！不過，大家咁熟工程嘢，你話冇留意、唔知道，Jenny真係覺得好匪夷所思囉……

　　嗱！今日屋宇署就派咗人去視察，Jenny就同大家一齊睇吓新司長同佢老公嘅兩間獨立屋，到底有咩僭建物啦：

4號屋（鄭若驊寓所）

1. 一間3.5米乘2.5米、高2.5米的天台屋；

2. 一個50平方米（約500呎）地庫；

3. 車房對出一個15平方米玻璃L型簷篷；

4. 地下樓層有0.5米乘5米、高3米的外牆擴建物。

3號屋（潘樂陶寓所）

1. 一間3.5米乘2.5米、高2.5米的天台屋；

2. 一個50平方米（約500呎）地庫； 

3. 車房對出兩個分別8平方米及4平方米的玻璃簷篷；

4. 地下樓層有1米乘5米、高7米半的外牆擴建物；

5. 花園水池，5米乘2.5米、高1米。

買定花生等睇戲

　　唉！今次呢個「僭建風波」唔知會點落幕呢？好打得嘅林鄭今次會點聯同各級官員幫鄭司長解圍呢？定還是鄭司長會主動一「辭」以謝天下，為林鄭班子保住面子？計Jenny話真係好睇過大台台慶劇！