今日係新民黨嘅「友誼小姐」容海恩（Eunice）喺沙田第一個議員辦事處開幕嘅大日子，Eunice請咗一眾政府高官同佢一齊切燒豬，有律政司司長袁國強同埋發展局局長黃偉綸。其實，以佢哋黨主席葉太嘅號召力，請到重量級嘉賓嚟切燒豬一啲都唔出奇。不過Jenny就發現，除咗呢啲大家成日都見嘅高官之外，仲有一位神秘嘉賓出現噃！

容總話燒肉都可以唔食就係為咗同Eunice影相？唔係掛﹒﹒﹒

Eunice租咗長毛舊議辦

　　呢位神秘嘉賓就係上次Jenny都講過嘅容總－容樂其啦！Jenny同大家回一回帶先！事關兩三個月前，Eunice去容總個Facebook 「踩場」，點知兩人「不打不相識」，吹咗一輪水之餘仲約出嚟食飯，就咁就認識咗啦！不過Jenny點都估唔到容總同Eunice已經Friend到今日會專程蒲頭「撐場」噃！

　　容總仲話佢以前都喺度返工㗎！原來呢個辦事處原本係社民連梁國雄（長毛）租開嘅，咁容總以前係長毛嘅議員助理自然就會喺度做嘢！但係因為長毛俾人DQ咗之後，就冇得繼續租用議員辦事處。

究竟「雙容」係咩關係？

　　點知，咁啱得咁蹺就比Eunice抽中，租咗落嚟，所以佢今日重返舊地，同Eunice影相再打返張卡擺上Facebook，用日文話「我返嚟啦！」，仲話「燒肉都唔食但呢張相一定要影」添！容總，你咁好易令人誤會㗎噃…..已經唔止一個人問Jenny究竟你同Eunice除咗大家都姓容之外，仲有咩關係喇……

　　Eunice就同Jenny講，其實容總事先已經同佢講，八到佢哋有開幕禮，話佢都會過嚟，Eunice就話「好呀」，所以今日又見到「雙容」出現了！大家咁Friend，有冇諗過同容總合作先？Eunice就笑笑口咁話「呢啲遲啲先算喇」！喂喂Eunice，係唔係即係代表有機先？Jenny都幾期待呢個「雙容合作」㗎！

袁國強走得快 淨係講ByeBye

　　另一個Jenny估唔到出現喺沙田嘅就係政司司長袁國強喇！事關早前一直盛傳佢做到月尾就辭職。12月扣埋假期，得返半個月唔夠，而家都好似冇咩動作噃？難得司長真人現身，Jenny一心衝前去問個明白，點知袁司長切完燒豬就急急腳走，淨係同我哋講咗幾次「ByeBye」咁大把，就上咗坐駕揚塵而去喇！

袁司長切完燒豬就急急腳走人，留多陣同行家吹下水吖嘛！我哋好關心你嘅去向啊！