有句說話講得好，「呢個年代，做人冇公關，食＿㗎喇！」其實做政府都一樣，君不見上屆特首CY冇乜拜「關公」，結果社交媒體出親貼文都係嬲嬲多過Like Like。今屆特首林鄭就醒呀！深知「關公」嘅重要性，雖然畀人話過「嬲嬲多到上個鼻」，但係最緊要都係肯學肯做唔會避，所以暫時嚟講林鄭個社交媒體專頁嘅貼文仲係Like領先少少過嬲嘅。

有次全港水浸，咁啱大台播緊嘅電視又係水災，網民就整咗呢張改圖以示對天文台嘅不滿。

天文台Fb小編即將面世

　　講到經常遭網民瘋狂派「嬲」嘅政府部門，天文台都可以話係重災區之一。事關次次打風落雨，天文台都畀網民批評後知後覺，尤其係平日極難先會掛八號風球，一到星期日就話掛就掛，令唔少網民都戲稱香港有「李氏力場」保護，仲因此整咗唔少改圖添！相信大家同Jenny一樣收埋咗一堆喺電腦同電話，以備不時之需。

　　其實呢，天文台都知道自己部門形象喺年輕網民眼中係強差人意，所以近年就好積極咁發展網絡公關工作，但點解未見有社交媒體專頁出現嘅？天文台高級科學主任宋文娟就同Jenny講話快㗎喇，而家積極籌備緊，仲話招聘工作已經將近完成，咦？咁我哋咪可以好快見到天文台小編囉！

　　雖然未有Facebook，宋文娟同Jenny講，佢哋都好留意網上嘅輿論，亦都覺得社交媒體嘅影響力好大，所以推出左好多資訊同計劃畀網民參與，一於與眾同樂，例如「社區天氣監察計劃」收集市民影嘅天氣相，佢話好多都好高質添！宋主任你真係識講嘢嘅啫！呢句應該氹到唔少網民喇！

打親風Jenny都會收到呢張「誠哥」改圖。

千億瀏覽率咪話唔勁！

　　宋主任仲講咗個小秘密Jenny知，佢話留意到係打風期間，天文台嘅網頁嘅瀏覽率係會急升，而喺2016年嘅總瀏覽率亦都突破左1000億次，都咪話唔勁呀！

　　而家天文台仲會每個星期喺YouTube出一集「氣象冷知識」，同網民交流，都有成10幾萬人睇㗎！以後仲有埋Facebook小編，天文台記得同環境局嘅「大嘥鬼」偷下師，一於齊齊成為政府嘅「網絡KOL」，教埋其他部門點喺網絡世界生存同提升形象啦！