古有昏君殘害忠良、魚肉百姓；今有老細剝削員工、奴役下屬。小生見盡身邊親朋好友日日被老細欺凌，真係睇唔過眼！決定一連兩集力數10大極品老細兼奉上應對招式，希望幫到個忙。

極品1：好大喜功型

　　奉行「功就我領，鑊就你孭」的原則。做野？畀下屬；孭鑊？畀下屬。至於攞威這些機會，當然是屬於佢的。

　　應對招式：精神勝利法。此類老細通常係無料扮四條、自卑兼人緣差，所以先要使出此等低招以證明自己價值。其實邊個做到野、邊個做唔到野，大家心照啦。你咪當畀個機會佢發噏瘋囉！

極品2：狂躁暴怒型

　　經常躁底，鍾意將怒火發洩喺員工身上。拍枱、掟筆、謾罵，甚至問候員工阿娘，以各種行動或言語攻擊下屬，將自己的快樂建築在別人的痛苦上。

　　應對招式：沉住氣，至少保持兩米距離。你絕對唔會想被佢啲口水噴中或被支筆掟中，因此務必要企硬。等老細發完脾氣，再傾工事，會比較容易聽得入耳（好似係…）。

極品3：疑神疑鬼型

　　成日懷疑員工偷懶，三不五時就出房巡視，分分鐘裝埋隱蔽鏡頭，令員工有被監視的感覺，似坐監多過返工。

　　應對招式：要有效消除老細疑慮，建議定時主動匯報工作進度，等佢知道你有做野同做緊乜野。

極品4：反覆無常型

　　簡單嚟講即係一時一樣。一個Project，前日叫你改A，琴日叫你改B，今日叫你改C，改十九幾萬次。當改到Version 20.46嘅時候，會叫你用返Version 3.14！心諗：「玩野呀？」

　　應對招式：原諒佢，呢個世上確實係有人唔知自己想點。打工仔唯有將每個Version留底，以防老細心血來潮要返某個史前版本。

極品5：模棱兩可型

　　指示模糊不清，講野一舊舊，經常要員工忖度聖意。當結果不似預期，就責怪下屬誤解佢意思。

　　應對招式：向老細請教時，避免用開放式問題，而要用引導性是非題。例如，唔好問：「你嘅意思係？」，而要問「你係咪想咁咁咁？」，所得的答案自然會明確好多。

 　　(待續)