返工日踩至少8粒鐘，換言之，打工仔人生中有3分1時間都在Office中度過！某程度上係無自由的，但如能在失自由兼悶死人的環境下，為自己找到丁點樂趣、自娛一番，的確爽YY。唔知你我他，在苦悶的Office裏面，又搵到幾多樂趣呢？

打工仔必做10件事：

1/ 狗衝返Office【8:50am – 9:00am】

　　9點正返工，08:50才步出港鐵站，當然要在10分鐘內買埋早餐衝返Office啦！

2/ 嘆早餐 【9:00am – 9:30am】 

　　全公司大部分人（包括腦細），拍完卡、抖順條氣、執番個樣之後，首要的是「食早餐」同「爬新聞」；港聞、娛樂、副刊、國際、兩岸……乜都睇晒，連汁都撈埋。

3/ 開吹水大會【9:30am – 10:00am】

　　若果腦細仲縮係間房未叫「開會~~」，那就是同事們開吹水大會的最佳「貪明」！大會議題包括：串下怕醜intern仔、交流Fb趣聞、傾下Lun廚食乜等等。

4/ 做嘢、發夢、刨Fb【10:00am – 12:50pm】

　　一邊努力工作，一邊發白日夢，一邊上Fb、覆msg。相信不少打工仔都會長開Fb或WhatsApp視窗Stand by。若不幸發現腦細從後閃過，都可9秒9立即「收檔」。

5/ Lun廚前10分鐘 【12:50pm – 1:00pm】

　　飯前10分鐘 = 最期待的畫面出現了：各人準備就緒，「叮」飯嘅拎飯，出街食嘅拎定銀包、去定廁所。做咗成朝，大腦疲倦，極度需要補充血糖（即係食Lun廚呀！）。

6/ Happy Meal！【1:00pm – 2:00pm】

　　Lun廚喇！個腦終於可以放鬆下，食嘢、煲劇、兼唔洗再偷偷摸摸上Fb，超滾動！

7/ 喪屍上身【2:00pm – 3:00pm】

　　「Lun廚後群症」發作，患者會感到眼皮有千斤重，完全難以集中精神工作；但同時又不能被腦細發現閣下「釣晒魚」。結果，只能撐大眼皮，擘大眼瞓，狀甚恐怖，似足喪屍。

8/ 做嘢、發夢、煲Fb加望鐘【3:00pm – 5:15pm】

　　繼續做嘢、發夢、煲Fb，加多一樣：望鐘。

9/ 零食時間 【5:15pm – 5:59pm】

　　臨近放工，腦細隻眼開隻眼閉，同事們可以瘋狂地食件餅、飲啖茶、吹下水、研究收工新蒲點。

10/ 跳起Yeah！收工！【6:00pm】

　　執好包袱，拍卡，收工，即閃。今日的未完成的工作聽日先算啦！

　　辦公室這個小小的生態區，每天的事大同小異、鎖碎平凡，懂得自己搵樂趣，娛人自娛又何樂而不為呢！