《魚缸博客》寧養寵物唔生仔，內地「貓經濟」背後的千億市場

　　《魚缸博客》最近博客嘅父母都係到感嘆，話當代中國人都唔生仔走去養寵物，剛好昨日元朗發生單「狗咬狗」事件，先發現原來而家好多人都睇到自己屋企隻寵物係「天咁大」。

　　其實，「寵物經濟」係21世紀中國嘅新經濟風口，有趣嘅係，近五年來新增寵物入面，狗只係增長2%，但貓卻增長50%。都不難明白，大家鐘意做「貓奴」，因為貓比狗容易養好多，又唔使出去放，係屋企俾糧俾水就得。

　　但你估唔到，原來中國嘅「寵物經濟」規模已經去到1500億元人民幣，當中佔最多嘅份額係乜呢？就係「殯葬」。以前屋企寵物死左，都係搵塊地埋左佢就算；而家就會有「清洗」、「火化」、「禱告」一條龍服務，如果你想你隻貓貓「走得好」，仲可以搵得道高僧幫你隻貓誦經、加持，葬係「永久墳墓」入面。呢一套加加埋埋，都要幾萬蚊人仔起。

　　從2019年起，中國嘅犬貓數量，首次超越左兒童數量，反映出內地「寵物經濟」嘅風口幾好，除左殯葬，仲有寵物嘅吃喝玩樂、睇下醫生，而家連保險業都有寵物保險，呢件事放係30年前或者好荒謬，但呢個時代睇確實正常不過。

　　博客同經濟學家吹下水，佢話呢種「養寵物都唔養細路」嘅風氣，某程度係「資本主義最後的末路」。以前人要生人，就要結婚、買樓、工作、養細路，每一環都係帶動經濟，但每一環都揸取得人類太盡；而家新一代突然覺醒，唔需要養細路，就無需要買樓結婚，只要租樓、養隻貓就得，唔需要有多餘消費，人口減少就無消費嘅紅利，經濟就慢慢就唔再活躍起來，資本主義賺埋呢一輪，往後可以賺咩呢？

　　或者學張愛玲話齋，唔生都係一種善良。

《編者按》本欄搜羅即市傳聞，惟消息未經證實，《經濟通》亦不保證內容之準確性。