《魚缸博客》內地「加盟店」陷阱處處，專呃投資初哥！

　　《魚缸博客》博客無聊打開個抖音，發現原來而加內地經濟唔好，好多人都想自己做生意，奈何唔識門路，就直接搵「加盟店」做，點知呢堆所謂「加盟店」陷阱處處，就產生左專門「打假」嘅博主，我都學識不少。

　　原來呢堆所謂「加盟店」係未必真係存在嘅，純粹係一個「項目」，只係開一間「示範店」俾你睇，間示範店有晒機器、產品，真係整俾你食，「作」埋個營利模式同埋純利率俾你聽，等你信到十足十。

　　之後就要你簽份「合作協議」，記住係「合作」，並唔係「加盟」，交完錢之後，佢真係可能會幫你裝修、俾機器你，但每一樣都係同你收費；幫你完成之後，你自己開啦，我唔理啦。

　　因為呢個品牌其實都唔存在，無知名度、無熱度，好似整咩檸檬茶、燒烤店，機器全部都係淘寶買，再自己貼logo賺你差價，總之機器我俾左你、品牌我幫你建立，你做唔起唔係我問題，係你問題。好多投資初哥入左坑之後，開鋪第一日只係做一百幾十蚊生意，搵埋都唔夠交租。

　　呢件事，原來係內地好盛行，而且你報警都未必有用，因為按照合同，你俾錢佢，佢俾機器裝修品牌你使用，原則上就完成左合同；你想告佢咩？佢就幫自己公司申請破產，法人都係求其搵個三線艇仔做，轉個頭開過第二間再呃過。好多唔識經濟商業嘅投資初哥，就係咁俾人呃左十幾萬，投訴無門。
　　
　　睇完呢堆片，博客都係個句：搵錢絕無捷徑。如果你投資個十萬八萬就可以有高回報，呢個世界仲有人去打工？個班投資者好多都係得中學學歷，合約唔識睇、生意唔識做，一心想發達，最後買左個教訓，慘！

《編者按》本欄搜羅即市傳聞，惟消息未經證實，《經濟通》亦不保證內容之準確性。