29/04/2020 08:44

郭思治跨界做YouTuber：恒指疫後見40000點

　　新冠肺炎肆虐全球，環球股市經歷洗倉式暴瀉，不少股民淪為蟹民，最新一「蟹」是熱炒原油ETF的散戶，不少人慘蝕六七成。「股價何時可以返家鄉？應該止蝕還是溝貨？」在各大電台電視的股市節目，近來常常聽到散戶這些提問，請股評人指點迷津。

　　香港第一代股評人、入行超過40年的郭思治（郭Sir），近期多了一個身份——YouTuber。他的YouTube頻道正式開設短短6個星期已有近2萬名粉絲追隨，成功吸引證券商落廣告，兼獲網民「課金」支持。

　　郭Sir開設YouTube頻道短時間大受歡迎，或和他的講股風格有關——融合宏觀經濟及技術分析作預測，不會給股民模稜兩可的意見。這位資深股評人大膽預測，當醫治新冠肺炎的藥物和疫苗誕生，加上現時環球央行量寬放水下，港股在疫情過後破頂可期，恒生指數上望40000點，最快明年出現。

股壇大隻佬變身 YouTuber 不足兩個月吸2萬粉絲

　　香港股票分析師協會副主席郭思治（郭Sir）的YouTube頻道「郭思治工作室」在今年3月正式開張，短短6個星期已吸引到近2萬名追隨者。郭Sir每天早上及下午開市前會錄影短評，下午收市後則會做一個小時的直播節目，近期他更請來股評人老友藺常念（藺Sir）一齊直播講股。每天的股評直播也吸引到1,600至1,700人準時收看，重溫觀看次數高達2萬次，更成功吸引證券商落廣告，兼獲得網民「課金」支持。

一枝腳架、一部手機，郭Sir每天早上及中午的股市短評，也是自己快手快腳錄影。

　　郭Sir突然當起YouTuber，難道今年65歲的他決定要轉換新跑道？其實郭Sir很早已發覺利用網絡平台講股很有潛力，他先後在前東家耀才證券（01428）及民眾證券發展財經台。今次他成立「郭思治工作室」這個專屬平台，郭Sir透露有很多新搞作，不止講股咁簡單。「我好鍾意做運動，若果日後有時間，我希望將健身、詠春嘅想法帶俾大家，不止做財經，會軟性一點做下運動、講下健康，想做到多元化。」

　　郭思治上世紀七十年代入行，「四會時代」（合併成港交所前的4間證券交易所）已擔任出市代表，多年來聽埋聽埋不少故仔，所以他又打算開一個節目「郭Sir話當年」，「由1973年開始講到現在，1973至1985年最多嘢講，李嘉誠入主和黃，牛奶公司置地一役，到包玉剛併購會德豐（00020），好多故仔，我記得幾多講幾多。」

冀助上市公司接觸股民

　　疫症當前，上市公司的分析員會議、飯局也全面停頓，郭Sir打算利用YouTube成為上市公司與投資者的平台，例如進行上市公司專訪，透過15至20分鐘的訪問簡介業務，將公司的最新情況直接傳達給投資者。

　　郭Sir入行超過40年，早於上世紀八十年代已上電視講股，是香港第一代股評人，「亞視係第一個搵我講股票，後來無綫都搵我，當時訪問我1分鐘，只係剪十秒鐘播出街。」他見證著香港股市九十年代飛升，也見證股評節目需求愈來愈大，慢慢發展到一小時股評節目，再到全日財經頻道。現在更發展到股評人「自立門戶」，很多股票分析師也開設Facebook粉絲專頁、YouTube頻道，隨時隨地作文字短評及視像直播。

成功吸忠粉追看直播

　　郭Sir的YouTube頻道雖然剛剛起步，但正式開張短短6個星期已有近2萬名追隨者，「反應比我預期中好，或者有一些投資者覺得我的分析用得到。」他謙虛地說。

　　郭Sir除了技術分析恒指走勢，也配合環球經濟狀況、股民心態作綜合分析，例如過去一個月肺炎疫情持續大爆發，他會分析疫情對實體經濟的影響；當股市大跌千點，他又會苦口婆心地勸撈底的股民控制注碼，在逆市中秉持投資紀律。郭Sir貼地的講股風格，令YouTube頻道成功吸引到一班忠實粉絲準時看直播，每日平均約1,600至1,700人同時收看，重溫節目的播放次數普遍超過2萬次。

除了講股，郭Sir 也在YouTube 教網友健身心得及健康飲食之道。

　　這個YouTube平台不只旺丁，也成功吸金。有證券商看中郭Sir的號召力，在其YouTube直播內賣廣告。一些網友也會「課金」支持，在直播期間發出付費留言。對於觀眾的「打賞」，郭Sir坦言很開心，重點不在於金錢的多寡，而是看到觀眾的心意，努力得到回報。

恒指明年或見40000點　入市三大板塊

　　今年來環球股市受新冠肺炎疫情拖累大跌，近期港股在24000點附近拖拖拉拉，究竟港股最壞時刻是否經已過去？郭Sir從宏觀經濟及技術分析，大膽預測一旦今次疫症完結，在環球央行量化寬鬆（QE）放水下，恒指有機會上望40000點，最快可在明年出現。

　　3月中美股連日暴瀉，聯儲局祭出無限量QE救市，郭Sir直言QE已扭曲了傳統牛市熊市的概念，受疫情衝擊，實體經濟大受打擊，股市100%會是熊市，但有了QE，現在是用錢解決問題，「以往波音（遇到現在的經營困難）已經要倒閉，但現在用資金可以解決問題嘅情況下，唔會有大型企業倒閉，因為唔俾你倒閉，咁你點解釋為熊市？」他續說，過去股市上升是來自民間企業的盈利，但現在不是了，是QE印銀紙推動升市，千億千億地印出來。因此他說現在不能用牛熊分界看大市，作為股評人只能夠講，現在這個階段升浪是甚麼形態。

　　他認為，疫症總有過去的一日，若明年出現疫苗及有效治療的藥物，「好似傷風感冒咁，食藥有得醫，咁現在災難式嘅破壞將會過去，大家唔再驚，中咗招，食藥休息瞓覺就得，就會出去消費。」他相信，疫情一旦過去，所有商業活動及旅遊全部回復正常，全球將出現報復式消費，利好消費及旅遊相關股份。

環球水浸市場再起風雲

　　更甚的是今次疫症期間環球央行，大舉QE放水及美國無上限QE，郭Sir說在未來市場資金充裕、利息低至零的情況下，「這一下不單止美股，港股也會試高位。疫情一過，當資金重新部署，恒生指數會創歷史新高！」他帶大家回看歷史，2003年沙士期間恒指最低為8331點，及至2007年在港股直通車效應下，當年10月創出31958點，4年間升了近3倍。然後是2008年金融海嘯，恒指最低跌至10676點，但在美國3輪QE放水下，港股2018年最高位達33484點，用了9年多時間升了約2倍。

　　「這一輪暫時低位係21139點，我唔知仲有無更加低，我唔理21000點好、20500點好，20000點好，下一次回升，我假設係升1倍，已經係40000點！仲要無變嘅係，經過這次技術上跌市之後，其實資金成本接近零，錢多咗好多，很大程度上金融市場又會起一個風雲！」

5月或會下試22000點

　　郭Sir相信，恒指升至40000點未必需要很久時間，「今次歐洲、美國，各地政府都高度重視疫症，所以俾啲時間，疫情一定可以受控。藥物出現嘅時間亦唔會好耐，若明年中藥物出現，股市唔會明年中先至升，明年初已經升咗先！我估一年時間左右，大家有心理準備，可能一個好開心嘅股市又會再出現。」

　　至於短線而言，郭Sir不認為恒指還會下跌太深，他以圖表分析，恒指由1月20日高位29174點開始今次跌浪，首個低位是3月19日的21139點。21139點是大跌浪的左腳，其後反彈至4月17日高位24666點，屬反彈市的頸線位。一般而言，大跌浪中的左腳和右腳往往相差6至8個星期，他預計右腳會在5月上旬出現，或下探22000點水平。

航空股風險不高

　　受疫情打擊，旅遊及商務活動全部暫停，航空交通陷入低潮，多隻航空公司的股價低迷，郭Sir較為鍾情內地的航空公司，包括國航（00753）、東航（00670）及南航（01055）。他直言這些股份由高位跌了50%，投資風險不太大。而且當疫症過去，航空交通恢復，「剩係14億人嘅內地航空往還都大得好犀利！」再者，國際油價低迷，「以往油價50幾60幾蚊一桶時，航空業都係咁樣做（經營），現在20蚊一桶，如果無疫症，航空股這一鋪飛天啦！」郭Sir選擇內地的航空公司，而非香港的國泰（00293），皆因他認為有中國國家背景較穩陣，「會唔會俾幾間主要航空公司倒閉？係近乎無可能嘅事。」

大數據主導大市

　　「今年真正主導個市上升係大數據，包括騰訊（00700）、阿里巴巴（09988）、平安好醫生（01833）、美團點評（03690）這些，全部係綫上數據，大家有一個想像空間落去，先至幻化到一個好大嘅升幅。」他舉例內銀股可以賺到多少錢，大家有數得計，民生所需的公司也不可能大幅增值，因此承受到投資風險、可進取投資的人，不能錯過大數據這主題。

看好5G換手機潮

　　2020年被稱為5G服務元年，最近香港電訊商也推出5G服務，郭Sir看好更換5G手機潮將很龐大，生產手機鏡頭的舜宇光學（02382）、觸控馬達的瑞聲科技（02018），以及手機品牌小米（01810）也看高一線。

有貨/未有貨要點做？

　　「每一朝一代都有股份帶領著市場行，未來係大數據同大5G，好難再返去由傳統工業股拉動，（投資者）投放資金要去有想像空間嘅地方。」

預留生活費勿博盡

　　不過，郭Sir提醒投資者，入市前衡量自己手上資金及倉位，「若然已有股票在手，手上資金唔多，就唔好買住！因為最重要係生活，若果份工無咗，屋企生活開支、小朋友讀書要錢，你買到一分錢都無，剩返好少錢嘅話，生活質素會受到影響！」本港最新失業率升至4.2%，郭Sir提醒大家不要過分冒進，「留返啲錢，可能要捱3個月、半年定1年，大家都唔知，要有經濟差嘅打算。短期內香港經濟差，未能夠改善，食肆捱唔住、打工仔凍薪，所以現在投資係可以，但唔好去到盡晒，做孖展更加唔可以！」

可分4或5注買入

　　若投資者未有貨在手，或還有閒錢可入市，買入前要做足功課，入市時記得控制注碼，假設手上有100萬元，不要一日內用盡所有彈藥入市，應分開4注或5注，然後每一注再按比例去買。「舉例你可以買100股騰訊、100股阿里巴巴、1,000股小米，100萬元要分5注，每注20萬元，20萬元再分開幾隻買，輸贏都係一兩千蚊，咁有乜大問題呢？況且個市已經跌咗咁多，慢慢部署吧！就算買完明日跌多三幾百點，咪等佢落多啲再買100股。」

　　他教路，若入貨後大市橫行，就忍手不要買。如果有一日升500點，「好似跌唔落」，可以考慮買第二注；又或者跌多800點，跌浪的右腳出現，才買多一注。最緊要做到進可攻，退有條件可守。

　　若果投資者現在已經重倉，沒有閒錢再入市，郭Sir告誡千萬不要將「老本」投入股市，重倉人士可以考慮換貨，「如果（兩隻股）差不多價錢，睇下邊隻將來會升得勁啲，將升得慢嘅換走。始終大家（兩隻股）都跌咗咁多。」

料油價可回35蚊一桶

　　日前紐約期油價格史無前例地跌至負數，不少投資原油ETF的散戶損手，近日很多股民也問郭Sir，買了原油ETF怎麼辦？他提醒大家要留意該ETF投資於原油期貨，每月也需要轉倉，而且每月會收取3%管理費，這隻ETF只適宜短炒。

　　今次油價一瀉如注，郭Sir坦言低油價不符合產油國的利益，他相信今次油價跌至約20美元，是沙地阿拉伯及俄羅斯迫美國「埋枱傾」的手段，「產油國計住條數，疫情下無需求、賣唔到油，咪賣20蚊一桶，因為存到爆晒。美國頁岩氣開採成本40蚊一桶，現在20蚊睇你（美國）點玩法，同我（沙、俄）講掂數啦！以後你出幾多桶油，我出幾多桶油，大家按住規則去做。」他相信，美國今年將舉行總統大選，特朗普為求連任一定會解決今次原油市場的「爛攤子」，「我睇好這個問題一解決到，上返35蚊一桶就會Stable（穩定）。」

做運動鍊堅持性格　郭Sir修出內外兼備投資路

　　「相對於一個大型浪，今次係大型嘅中期調整，由歷史高位33484點，跌到落第一個位低24540點，反彈上30280點，落返24899點，再上29174點，再落返21139點……」每次訪問郭Sir，他超強的記憶力每次也令記者相當佩服，恒指的高位低位、技術關鍵大位，他全部倒背如流，每一句分析也做足功課。

　　超強記憶力背後，原來郭Sir下過一番苦功。多年前他發現自己的股評分析有所不足，於是努力鑽研每次升浪跌浪的起點，研究波幅走勢，突然茅塞頓開，由當時起他便記著這些指數關鍵位，「一做節目，（背出一連串數據）全世界噩然，但其實我已做咗兩年功夫。」

每日健身簡約飲食

　　「在這個圈我唔係最叻嘅一個，但我好堅持同勤力。」這份堅持和勤力，或源自他熱愛運動健身。今年65歲的郭Sir多年來堅持節制地飲食，每天保持著龐大的運動量。「食嘢我好檢點，唔食肥嘢，飯我有Quota（限額）一星期夾埋兩碗，每餐唔會食全飽，唔餓就算數！」他分享自己的早午晚餐單——早餐吃兩隻烚蛋，午餐吃一個蘋果或梨，晚餐吃多一點，包括吃菜、雞胸肉、少量白飯和飲湯。

　　運動方面，郭Sir每日也健身合共2,000下，「在斜板提腿練下腹及人魚綫，我一日做500下，在斜板做Sit up練上腹，一日做2,000下，分開做。修兩邊腰每邊做500下，拳上壓每日做500下。引體上升每日做150至200下，每次做30下，做4組練背肌，再加埋推胸每日做150下，練手部大概做100下，練腿都係100下；仲有每晚我一定落停車場壓腿、拉腳筋，一星期一日打詠春、打木樁…….」說到這裏，郭Sir讓記者「實測」其「六舊腹肌」和「老鼠仔」，「股壇大隻佬」確是名不虛傳！

投資取向隨年歲變

　　健身鍛鍊的堅持也影響了郭Sir的投資心態，「我唔會隨意買兩手玩，會理性地等，應參與時先參與。後生時心口孭個勇字，（買股票）會當賭局，但現在我年紀大咗，最緊要唔係舊錢可以賺幾多錢，而係個本我一定要保證百分之一百喺度。因我自己始終要退休，我屋企人，我個女，我要照顧佢哋，唔能夠因投資失誤影響佢哋嘅生活，這個係我做老豆、做丈夫嘅責任，所以我好堅持，有啲錢，我係唔郁就唔郁！」