【玄學花生】特首選戰點睇？

　　未到新年，已有一番新氣象。

　　大家奔走相告，開香檳、剝花生。不只梁生自己鬆一口氣，大家都像空氣中突然注了氧！High High地。

　　事前沒有人信，不過好意先生貼中咗！

　　我在本欄曾報道他的預測，玄機就在特首名字中，當時好意先生誓神劈願，話CY肯定唔會連任。

　　「震英吖嘛，當然DQ啦！」他預測。

　　「震英啫嘛，又唔係震中。」我拗。

　　「英字入面有個央字，即梁特首做咗有D嘢觸動咗中南海嘅神經。」

　　他認為中央要香港輔助發展大陸經濟，而梁推行鬥爭分裂，當然令大陸領導唔like。我當時覺得好意先生是鐵桿反梁份子，以為此乃其主觀意願而已。

　　現在想來，又似層層喎。

　　梁特首宣布棄選之時，觀其心情，的確是心亂如麻，有點措手不及。雖然他以慈父形象感動不少人，但以他一向勇往直前、勇悍無比的毅力霸氣，又豈似會為仔女私情而誤了治港大業？而且齊昕10月已入院，最近又向有些記者報了平安。媒體傳中央是因怕若押注在CY，恐怕拿不到選委600票。據一些有資格選出選委的朋友說：有些候選人的政綱就標榜反梁，所以這傳聞未必空穴來風。不過相信若是中央勸退CY，必然有golden handshake。他遊工展會當日，神情輕鬆、笑容滿面、氣色神采之佳，可謂近年罕見。

　　講到神采，就要提另一隻黑天鵝──娥姐於兩周多前宣布明年中辭職、亦即不會參選特首，卻突然因頂頭上司話唔選，正考慮自己落場，宣布時狀態大勇，眼睛烱烱有神，神色自若，似乎頗有信心。

　　好意先生對此又抒高見。他說林鄭屬雞，明年雞年伏吟，必有變動。財爺屬兔，兔雞相沖（卯酉沖）。而酉金尅卯木，又鄭字中藏酉，勢較強。加上明年乾位有難，不利男性長者，可能有麻煩，勢頭似更利林鄭。

　　在政圈動物園中，除了黑天鵝外，尚有黑馬，且看特首之爭，如何繼續吊詭、繼續精采！