原本港鐵出事就鑊鑊新鮮鑊鑊甘，加埋沙中線醜聞，幾乎個個星期報紙頭版都有港鐵份，不過《逃犯條例》修訂一出，全世界都轉移曬視線，港鐵成功從焦點甩身，真係要多謝特首林鄭喇。

 

 

 

　　講時講，呢排局勢咁緊張，都爭啲唔記得港鐵主席馬時亨就Last Day!今日Jenny 就去咗馬主席嗰卸任茶會，馬主席未坐低已經話唔談論社會議題喎，知嘅!知嘅!即使大家問咗，都唔期望你會答啲咩新嘢啦!

 

道歉界KOL—馬時亨

 

　　不過，Jenny同行家都有傳媒明知不可為而為之嘅精神，出盡力兜曬圈咁問，主席都終於肯講兩句喇。嗱!講到道歉，馬主席就最有資格Comment喇!皆因經驗豐富嘛!作為政商界前輩，佢親身示範咗咁多次，當年做問責高官因為「仙股」事件鞠躬道歉、做咗港鐵主席就因為「OK」論上電台道歉一次、沙中線醜聞開記招又道多次。

 

　　前警務處處長曾偉雄之前就話，唔希望道歉成為「風土病」。馬主席就話佢十分尊重問責制精神，有唔啱就要道歉! Jenny 非常讚同呀! 馬主席仲補多句，如果講到係病，就會畀人覺得道歉無誠意咁話!至於個道歉真唔真誠? 馬主席就話，要睇聽嗰個心中把尺過唔過到喇! 

 

退休湊孫　風雨留俾熱廚房

 

　　睇吓主席個笑容幾咁「寬容」，近排大家聽到嘅道歉真唔真誠，就真係見仁見智啦……

 

　　其實，道再多歉都冇用，信唔信你先係重點嘛!講咁多都無謂啦，馬主席退休就一心返屋企湊下孫仔孫女，出面呢啲風風雨雨，留俾熱廚房內咁多位喇!

 

　　最後，馬主席就用「希望香港家和萬事興」作結。Jenny覺得，係呀!其實有得安穩又有邊個想亂喎!

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇