林鄭堅持修訂《逃犯條例》，搞出「反送中」呢個軒然大波，家下個個口風都軟曬，左一句社會要安穩，右一句唔好挑動情緒，驚死激親啲市民又上街示威遊行。

　　嗱！教育局局長楊潤雄今日都出嚟「和諧」「和諧」一下，不過佢選擇嘅方式就有啲特別，係「寫信」去某親中報紙俾年輕人！話大家坐係同一條船，會聆聽青年人聲音，希望大家互相同行喎！

潮流興「復古」？上IG實際啲

　　不過呢，乜而家啲後生仔仲會睇報紙咩？有嘅，少啲囉！據Jenny所知，睇開呢份報紙嘅讀者，大多都係充滿成熟魅力、穩重可靠嘅熟男熟女。楊局長你寫信登報咁復古，班後生仔女應該都唔識欣賞。

　　而家就連Facebook都畀人話係上咗年紀，媽媽級先用嘅嘢。楊局長，Jenny建議你不如跟真．後生仔學下嘢，喺IG呀、連登呀嗰類媒體，Post你封公開信，順手賺返一千幾百個like同share，咁先係與青年同行嘛！

　　但政府家下民望咁嘅款，會唔會局長驚like就呃唔到，反而得返啲「嬲嬲」同「負皮」？到時局長傷心就唔好啦。

　　話說回來，其實而家個個都長命百二歲，羅致光局長教落，60歲先係中年，咁楊局長係某親中報紙寫信俾「年青人」，其實諗諗下又冇錯噃！

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇