反修例爭議經過咗一個月之後，示威者噚日終於衝出港島，第一次喺九龍遊行！Jenny覺得咁樣其實都幾有新意，事關次次做遊行採訪都要出港島、行咗咁多年行極都仲係嗰條路，你唔厭我都悶！而遊行完咗之後，根據前幾次嘅經驗，一定有啲示威者留低唔走，噚晚都唔例外。呢個時候，警察叔叔又會出場喇！

 

 

口講無憑 Show Warrant最實際

 

　　咁警察要執行職務驅散人群，Jenny都明嘅，而示威者見到警察封咗前路嗰時，都開始慢慢後退走人，點知原來警察喺後面嘅路口都封埋喎！何解警方想驅散人群，但又要玩包抄呢？Jenny就諗極都諗唔明喇！還請高人指教解釋一下呢？

 

　　另一個由612遺留到噚晚都仲未解決嘅疑問，就係「消失的委任證」喇。Jenny噚晚仲係見到有唔少警員件背心明明有個證件位，但係入面一係就乜都冇，一係就得張紙。最經典莫過於，行家同示威者都有問疑似阿Sir（s），你個證呢？有位著住便服嘅男子就大大聲咁話：「警察執行職務時，係唔需要展示委任證嘅！」

 

　　此言一出，全民嘩然，大家都驚自己聽錯咗，冤枉咗阿Sir就唔好啦！紛紛叫佢「講多次」、「講多次」，之後有個白衫警員就話佢有1張證，仲話身後嗰啲都係警務人員！跟手拉隊走人。

 

便服男真的是警察麼？

 

　　但大家都唔太收貨，事關Jenny做咗咁多年傳媒，加埋《警訊》都成日教，《警察通例》講明要Show證！唔係的話就會被騙徒有機可乘！等小妹即刻搵返《警察通例》嚟睇下先！

 

　　《警察通例》第20章 第14-2條：

 

　　只要擬進行的工作不妨礙人員妥為保管委任證，警務人員在任何時候均須隨身攜帶委任證。便衣人員不論是否當值，在與巿民接觸和行使警察權力時，必須表明身分及出示委任證。在案發現場的便衣人員，須將委任證掛在顯眼的地方，讓人易於辨認其身分。

 

　　其實《警察通例》仲有好多咁公開畀公眾睇，經Jenny千辛萬苦，終於喺警方嘅官方刊物《警聲》入面發現咗個「醒目警察小貼士系列」，話根據《警察通例》第20章 第16條，便衣人員與巿民接觸時，不論是否當值，在行使警察權力時，必須表明身分及出示委任證。如由一隊軍裝人員執行任務，例如在查核牌照期間，如市民提出要求，只需其中一名人員按要求出示委任證便可。如警務人員未能出示委任證，而原因是「要求不合理」或最終未能遵辦，人員必須在記事冊說明原因。(詳見:https://www.police.gov.hk/offbeat/822/chi/f01.htm)

 

　　大家留意返！係「一隊軍裝人員執行任務」先可以「一證通行」，但一直以來大家講緊嘅係著便服嘅疑似阿Sir（s）喎！跟返規矩，點都要Show個Warrant嚟睇睇啦！

 

　　不過，有姐妹就同Jenny講，其實警方噚晚已經戴咗證，只不過張證係叫「唔使委任證」咁解啫。Jenny就覺得叫「國王的委任證」貼切啲喇！有緣嘅咪睇到囉！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇】港府本年度已錄逾2千億元赤字，有議員指或難符基本法力求收支平衡之規定。你認為當局應如何解決財政問題？► 立即投票