降龍十八「蔣」民記慘被三招了？

　　做人最緊要係夠真，但係當然政治人物另當別論啦！係人都知搞政治「語言偽術」係必修科。但係總有人會反行其道，一次又一次用率性嘅語言、直接嘅態度，係一眾建制議員之中脫穎而出，講嘅民建聯蔣麗芸（Ann姐）呀！

 

　　Ann姐一向敢言，近排更放飛自我，盡顯心直口快嘅坦率性格，100%我係真心架，真心地痛擊友軍。你冇睇錯，Jenny都冇寫錯，係「友軍」！

 

 

 

三打民記終不悔

 

　　第一招：神龍擺尾

 

　　當建制派一呼百應，個個都話明白理解支持政府暫停修例工作嘅時候，Ann姐突然一個屈尾十，溫馨提醒大家，政府可以推遲一兩個月，落啲力做宣傳，搵幾個電視台日播夜播，轉個頭又可以重推《逃犯條例》！ Ann姐呢一席話即刻瘋傳！

 

　　嚇到民建聯（民記）拿拿臨衝出嚟，四圍澄清「只係個人意見，不代表民記立場」。Ann姐一出手，就一腳踢正民記心口。

 

　　第二招：蛟龍翻江

 

　　前幾日特首林鄭用「壽終正寢」嚟形容《逃犯條例》，Ann姐又運功出招，直插林鄭既然講得出「壽終正寢」點解又唔乾脆講「撤回」？嘩嘩嘩！反了反了！Ann姐呢下蛟龍翻江，唔好話林鄭一棍扑死支持佢嘅人啦，佢已經反手一棍扑落民記身上。

 

　　呢下民記主席李慧琼，都唔知點接招好喇，只好跟大隊，話新舊說法實質上無異。

 

　　第三招：龍遊天地

 

　　就係今朝，Ann姐使出第三招－－龍遊天地！話佢曾經考慮提出成立獨立調查委員會，但係擔心議會有強烈爭議所以算數喎。唔～果真龍遊天地，「蔣」勢來去不定，勁若風雲色變，卸守、游斗兩皆宜。

 

　　其實大家本是同根生，割席何太急呢？不過Ann姐系出名門，一向都係冇乜包袱，咁有父幹係有資格任性嘅！明白！明白！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情