鄭若驊網誌發文道歉想過骨？Ann姐撐重推修例民記即割席

　　繼楊局長出嚟「和諧」之後，今日就輪到係律政司司長鄭若驊嘅發言時間喇！係呀！鄭司長終於道歉喇！高官果然不同普羅市民，有獨特嘅道歉方式，一於透過網誌發文道歉啦！

道歉要有「身體語言」是常識吧！

　　其實，政界元老級人物葉國謙都提咗大家醒水啦，道歉要有「身體語言」是常識吧！特首道歉都好啲，發完新聞稿，過兩日起碼仲見到本人出山親口講返句吖！鄭司長嘅道歉？真係Sorry，連髮尾都見唔到啊！Jenny數咗數，鄭司長成個道歉計埋標題先啱啱過380字，真係仲短過小學生作文呀。鄭司長你都話經一事、長一智，要正面回應社會的期望，Jenny就建議你聽下葉國謙講，學下點樣正面、真誠道歉先啦。

召喚曾前主席

　　不過，特首、司局長們點Say Sorry都冇用啦，呢頭Say完Sorry，嗰頭就有蔣麗芸（Ann姐）出口「助攻」！小妹真係要講句：唔怕神一般的對手，只怕……

　　嗱嗱嗱！Ann姐做訪問時就溫馨提醒咗大家，政府推遲一兩個月，落啲力做宣傳，轉個頭又可以重推啦！嗰頭講完，即刻嚇到民記衝出嚟，又facebook又Whatsapp Group咁澄清，話Ann姐一早講咗係個人意見，唔係民記睇法啊！

　　Ann姐都咪話唔用心良苦呀，幫商家炒貴啲刀。你知啦，潮流興割蓆，你割我，我割你，割多兩割，多多把刀刀都唔夠用呀！Ann姐家下為割席文化再添一把，真係要召喚曾鈺成前主席：「蔣麗芸議員，我建議你少D講無乜用的說話！」Jenny諗諗下，唔知本身夠成班高官同建制派坐嘅大蓆，而家仲割剩幾多cm呢？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇