請假唔使Say Sorry！放假係返工一部分，應該理直氣壯、大大方方！你會feel guilty嗎？

　　有種同事或上司，攞假總會覺得好唔好意思，覺得自己理虧於其他同事，甚至覺得自己好似做錯事咁。

 

　　點解？從佢哋放假前同其他同事嘅溝通就可略知一二。

 

　　“Sorry, I'm planning to take AL on coming Friday. I apologize for any inconvenience caused.”

 

　　最後仲要加多句。

 

　　“But I will stay online as much as I can.”

 

　　睇完呢位同事通知其他 teammate 佢放假嘅 email，完全想像到佢鞠住躬，然後碎步向後退出公司門口，偷偷地去放假嘅情形。

 

　　其實放假又有咩錯呢？放假其實係返工嘅一部分，係一項高中低層都要「履行」、contract 亦有列明嘅職務。所以只要你有交帶，上司同HR又approve，自然可以理直氣壯，大大方方咁放假。

 

　　所以請假時請唔好say sorry。

 

　　此例一開，你可以想像第時放lunch、放工、去廁所，你都將要卑躬屈膝，偷偷摸摸咁行。或者，你而家已經係咁（即：準時些少放工，你都已經唔敢同同事 say bye bye，自己靜靜地扮去廁所，然後偷走出門口）。

 

　　放假放到要 say sorry，你彷彿為自己製造咗一個做錯事嘅觀感，你好似好冇交帶，未做晒嘢就去放假，所以要先 say sorry。但如果你已經為人上司，你亦為同事製造咗一種無形壓力 —— 攞假，原來要咁唔好意思。試問你自己放假都已經要say sorry，咁下屬想攞假時咪變咗罪該萬死？

 

　　記得，只有你自己先可以攞走你光明正大、理直氣壯放假嘅權利。其實當你攞AL 會感到guilty，代表你身心都未ready，邊放假邊辦公其實仲pity。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

第九屆「傳媒轉型大獎」請投etnet經濟通一票！ ► 立即行動