Facebook改名！社交媒體由個人為中心，變成群組為中心！是好是壞？

　　近日有媒體報道指Facebook正考慮改名，以配合長遠業務發展，希望將來會加入VR、AR等不同元素，開拓社交媒體新一頁。近年玩Facebook嘅人愈來愈少，除咗出現好多新嘅競爭對手外，大家對Facebook亦開始感到厭倦。

　　十多年前Facebook等社交平台初初出現，目的主要係加強朋友間連繫或方便大家搵番失聯多年嘅舊朋友，係一個以「朋友」為主軸嘅平台。之後出現不少互動元素如小遊戲、心理測驗、投票等，都係以「人」為主軸，但趨向「娛樂」為主。其後加入公司專頁及廣告功能，令不同品牌公司投放資源，希望以專頁轉化成銷售，令社交媒體過度商業化。「人」嘅元素愈來愈少，並非再係與朋友互動嘅平台，慢慢變成一本雜誌。另外一啲多功能性嘅社交媒體亦開始失去其立足點，原因用戶大多只會用其一、兩個功能，其他功能往往於推出後不久就被巿場忘記，未能真正成為「一站式平台」。見得好多平台慢慢走向牛角尖。

　　其實每門生意或行業，每隔數年都會有朝代嘅大轉變，1至2年一小變，3至5年一大變。如多年前嘅台式餐廳大大杯飲品，只有堂食並未有外賣，但幾年後就變成成行成巿嘅外賣茶飲店，以不同形式、主題、產品推出巿場，反而堂食大杯裝飲杯慢慢減少。而社交媒體嘅轉變，就由「人」變成以「事」為中心。如近年愈來愈多以運動（如跑步）、打機（如遊戲內外嘅社交圈）、飲食（如燒賣群組）、兩性關係（如我老婆嫁咗比Mirror）等等嘅群組或App出現，以「事情」/「取向」出發，喺群組內更會將朋友熟悉程度分組，以保持私隱，成為新類型嘅社交平台。

　　呢類平台除咗有較明確定位外，仲有兩個好處，第一係擁有獨立私隱度。其實私隱問題係近年較多人關注嘅一環，多功能平台所收集嘅資料相對較多，目的希望支撐其他功能之餘，亦可以令廣告推送更為精準，打造更好個人化體驗。但有利亦有弊，不停收集個人資料反而會令用戶反感。反之以「事」為中心嘅平台收集資料時只會以「事」為主，用法亦主要以「事」行先，其他私隠會有一定距離，用戶會較為安心。第二好處係介面直接，對比一站式平台/App，因為要平衡所有功能而作統一設計，兩頭唔到岸情況會經常出現。所以早年Facebook推出多個銷售功能，希望能夠搭建一個閉環式銷售平台，由宣傳、銷售、送貨、用後分享等，所有嘢都喺Facebook內進行，但最後亦未見成效，有部分功能更於推出不久後下架。

　　所有生意都係先由冇做到有，再由有做到專，同時又會追求質及改革。喺未有更嶄新嘅科技出現前，一站式或多功能性平台會慢慢被淘汰，當有科技大革新後另類多功能平台又會再次出現。期望Facebook能跳出呢個循環，而非無限輪迴於同一漩渦之中。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】上海有女子赴瑞士接受安樂死，引網民熱議。你是否支持安樂死？► 立即投票