粟米六粒飯！失戀沖喜套餐！為產品改古靈精怪名稱可間接刺激消費！甚麼是「增加場景」營銷策略？

　　不同公司嘅生意及宣傳策略大多以「刺激顧客消費」為重點，策略只懂得「直接」針對銷售，缺乏了解顧客體驗。希望顧客消費再消費，繼而成為會員再消費。但單一專注消費嘅策略已經唔能夠滿足到現今嘅顧客，反之過於硬銷嘅手法更會引來反效果。尤其係一啲較傳統行業，會被行業行常而規範自己。其實好多營銷策略已經開始由「刺激消費」轉為「增加場景」，希望以場景增加顧客體驗感受，間接地刺激消費。以傳統嘅飲食及零售業為例，可變嘅地方看似不外乎產品／食物品質及外觀、商店／餐廳環境、售貨員／侍應言行等等，但其實只要「think out of the box」，單單靠產品 / 菜式名稱，已經能夠製造不同新場景。

　　品牌檔次較平民化嘅公司，會因為冇品牌束縛而有較大自由度，所以佢哋經常多以玩味性角度出發，能夠以較大突破作招徠，唔太介意反效果所帶來嘅傷害。例如早年有茶餐廳推出「粟米六粒飯」，可能係寫時忙中有錯，但就錯有錯著，引來好多人作網上分享，產生大量免費宣傳及互動。亦有壽司店推出非傳統壽司，不論味道如何，大眾聽到其古怪名稱配搭已議論紛紛。其後亦有好多餐廳及茶飲店將餐牌上嘅名稱加入不同玩味性字句，例如「大龍鳯梨茶」、「失戀沖喜套餐」等等，產生大量互動。以上就係所謂「增加場景」嘅手法之一，由店內轉到網上。

　　當然如果能好好拿捏品牌界線，同類做法仲可以帶來更多額外效果。瑞典IKEA早年前推出名為「Retail Therapy（零售治療）」營銷活動，為一啲看似極為普通嘅產品重新改名、再次注入活力。IKEA推出前發現，好多瑞典人經常上網搜尋有關家庭及兩性問題嘅解決方法，而佢哋就睇中呢一個搜尋巿場，希望以另類宣傳方式推銷產品。於網頁上先為部分產品改名，再配合SEO等搜尋引擎策略，引來大眾關注刺激銷售。今次改名主要想將傢俬同家庭日常細節連繫起來，增加大眾共鳴感。例如將紅酒杯改為「When children leave home」，座枱鏡改名為「World's most beautiful people list」，梳化床改為「My partner snores」等等。推出後不但引來迴響，最後更為銷售帶來超過25%增幅。

　　而較高檔次餐廳，亦暗暗有自己一套做法。可能大家並冇特別留意，其實高級餐廳較傾向使用「顧客睇唔明」嘅餐牌。一來希望保持品牌形象，令人覺得餐廳獨特，二來亦可以增加侍應與顧客嘅互動，間接推使顧客向侍應生查詢，令侍應有較多機會推銷，而當顧客讀錯複雜嘅餐名時，還可以增加同侍應嘅互動，帶來對公司同侍應嘅信任。

　　自社交平台及疫情出現後，如繼續以往硬銷或太傳統嘅營銷手法，不但唔能夠增加銷售，更可能有反效果，要適當地增加場景才能避免品牌老化嘅問題。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票